بجلی نا پدریسہ و بے سلنگ آن فراوانی الس نا بنداوی آ ویل ءِ،محمدخان طور اتمانخیل
بجلی نا غیر اعلانیہ لوڈشیڈنگ اٹی کمتی اتنگ وولٹیج نا ویل آتا ایسری کن بھرمی گام گیج کننگے، باسک بلوچستان اسمبلی
لورالائی، صوبائی اسمبلی نا باسک حاجی محمد خان طور اُتمانخیل تون اسسٹنٹ کمشنر بوری احمد زیب ملازئی و ایکسین واپڈا رحیم اللہ کبزئی اوڑدہی کریر۔ اوڑدہی ناوخت آ ضلع لورالائی اٹی بجلی نا غیر اعلانیہ لوڈشیڈنگ، بجلی نا فراوانی ٹی مون تروک ویل و الس ءِ مون تروک خواری تیاں تعلقدار جم گپ وتران کننگا‘ داوخت آ حاجی محمد خان طور اُتمانخیل پارے کہ بجلی نا پدریسہ و بے سلنگ آن فراوانی الس نا بنداوی ویل ءِ، ہرانا کل زہم اُرائی صارف، واپاری ہند‘ کشت وکشار و زند انا ایلو بشخ آتیا تمک۔ او واپڈا کمامدار آتیا زور شاغا کہ بجلی نا غیر اعلانیہ لوڈشیڈنگ اٹی کمتی اتنگ، وولٹیج نا ویل آتے ایسر کننگ و بجلی نا فراوانی نا نظام ءِ گچین جوڑ کننگ کن بھرمی گام گیج کننگے تاکہ شاری تے مون تروک خواری تے ایسر کننگ مرے‘ ایکسین واپڈا رحیم اللہ کبزئی بجلی نا ساڑی حالیت، لوڈشیڈنگ نا سوب و مون تروک ٹیکنیکی ویل آتیان معلومدار کرے و بجلی نا فراوانی ٹی جوانی اتنگ کن دوئی وسیلہ غاتا رِد اٹ گام گیج کننگ نا باور کرفے۔ اوڑدہی ٹی اسسٹنٹ کمشنر بوری احمد زیب ملازئی تون ضلع لورالائی ٹی امن ایمنی نا جم حالیت، الس نا جان و مال انا رکھ، انتظامی باندات و شاری تے مون تروک ویل آتا بابت ہم گپ وتران کننگا۔ حاجی محمد خان طور اُتمانخیل دا ہیت آ زور شاغا کہ ضلع اٹی امن ایمنی برجا تخنگ، الس ءِ ریلیف فراوان کننگ و سرکاری ادارہ غاتا کارکڑدءِ پین گچین جوڑ کننگ کن انتظامیہ و تعلقدار محکمہ غاتا نیام اٹ بھرمی رابطہ و کمکاری المی ءِ‘او پارے کہ السی ویل آتا ایسری و علاقہ نا شونداری ننا اولیکو اولیت ءِ، کل تعلقدار ادارہ غاک تینا زمواری تے السی خذمت نا جوزہ نا رد اٹ سرایترتاکہ شاری تے بنداوی آسراتی تا فراوانی ءِ پک کننگ مرے۔