السی کسر و فٹ پاتھ آتیا ہر وڑ انا ودیکاری تے ہچ گہس سگپنہ،فضل الرحمان کبدانی
بازار اٹی نظم و ضبط برجا تخنگ، ٹریفک نا روانی ءِ پک کننگ و شاری تا ہن بر نا گچین آسراتی تے اولیت تننگک
دکی، ڈپٹی کمشنر دکی فضل الرحمن کبدانی نا خصوصی پارت آ اسسٹنٹ کمشنر دکی محمد اکرم حریفال ضلعی انتظامیہ و تعلقدار کارندہ غاتتون اوار دکی بازار اٹی ودیکاری تا برخلاف کارروائی کرسا کسر و فٹ پاتھ آتیا جوڑ کانود آن چَپ ودیکاری تے اینک کرے۔ کارروائی ناوخت آ بازار نا کیہی ہند آتا دورہ کننگا و کسر، فٹ پاتھ و السی کسر تیا تخوک آ دکان تا ودکی گڑاتے اینک کننگا تاکہ شاری تے ہن وبر اٹی مون تروک خواری تے چٹفنگ و ٹریفک نا روانی ءِ گچین جوڑ کننگ مرے۔ داوخت آ اسسٹنٹ کمشنر محمد اکرم حریفال دکاندار تے سخت پارت کرے کہ او سرکاری دنگ انا شرف ءِ کیر و تینا دکان تا گڑاتے پک کروک دنگ اٹ تخر۔ او پیدوار کرے کہ السی کسر و فٹ پاتھ آتیا ہچ وڑ انا ودیکاری ءِ سگنگ مفک۔ اسسٹنٹ کمشنر پارے کہ بازار اٹی نظم و ضبط برجا تخنگ، ٹریفک نا روانی ءِ پک کننگ و شاری تے ہن وبر نا گچین آسراتی فراوان کننگ ضلعی انتظامیہ نا اولیکو اولیت آتیٹی اوار ء۔؛ خلاف ورزی کروک آتا برخلاف کانود نا رِد اٹ کارروائی کننگک‘ ضلعی انتظامیہ نا کنڈ آن دا ارادگی نا درشانی کننگا کہ ڈپٹی کمشنر دکی فضل الرحمن کبدانی نا پارت نارد اٹ شار ءِ ودیکاری تیاں پاک، سفا و منظم جوڑ کننگ کن کارروائی تے بے فرق آن و پدریسہ برجا تخنگک۔