پاکستان نا معدنی دولت ءِ کاریم اٹ اتنگ ننا جم قومی مسخت ءِ،فیلڈ مارشل عاصم منیر

اسلام آباد، چیف آف آرمی اسٹاف و چیف آف ڈیفنس فورسز فیلڈ مارشل سید عاصم منیر پارینے کہ پاکستان ءِ مریس وختی معدنی زرکاری کن اسہ گوبر منزل اس جوڑ کننگ قومی اولیت ءِ۔ معدنی وسیلہ تیاں پبی فائدہ ہرفنگ کن بیرہ خام مال انا برآمد بھاز اف بلکہ ریفائننگ و مینوفیکچرنگ تون اوار مچ آ ویلیو چین ءِ ملک اٹی شون تننگک او پارے کہ کان کنی نا بشخ اتون تعلقدار زرکاری، صنعت، ڈٹ، کانکن و ہندی آبادی تا رکھ اکن ہر وڑانا گام گیج کننگ انگ ءِ ودا رد اٹ برجا سلک۔ پاکستان منرلز انویسٹمنٹ فورم 2026ء نا شریدار آتیان تران کرسا فیلڈ مارشل سید عاصم منیر پارے کہ پاکستان نا معدنی دولت ءِ کارآمد جوڑ کننگ ننا اسیجائی قومی مسخت ءِ۔ ننا ہدف ہمو مریس وختی اواری جوڑ کننگ ءِ ہرا پاکستان و اونا شریدار آتیکن مدامگی زرگزرانی قدر ودی کیر۔ او پارے کہ کان کنی نا مچ آ چاگڑدی نظام نا سیکورٹی ءِ پک کننگ کن گام گیج کننگ انگ ءِ‘ کانڑ و کانکن تتون اوار زرکاری، صنعت، ڈٹ و اوفتتون گنڈوک بندغ آتے رکھ فراوان کننگک تاکہ معدنی بشخ انا شونداری کن گچین چاگڑد جوڑ مرے۔ چیف آف ڈیفنس فورسز پارے کہ پاکستان نا مسخت بیرہ خام معدنیات برآمد کننگ آخا بلکہ ریفائننگ و مینوفیکچرنگ اسکان مچ آ پیداواری پنجر ءِ ملک اٹی ٹہیفنگ ءِ، تاکہ معدنی وسیلہ غاتیاں زیات آن زیات زرگزرانی فائدہ دوئی کننگ مرے و مدامگی شونداری نا بنداو تخنگ مرے۔ فیلڈ مارشل عاصم منیر دا ہیت آ زور شاغا کہ معدنی بشخ انا شونداری نا فائدہ غاتا ہندی آبادی اسکان رسیفنگ المی ءِ۔ معدنیات آتیاں شُپ انگا علاقہ غاتا الس بایدے تینا زند آتیٹی حقی و پیدوار جوانی خنے انتئے کہ شونداری نا عمل اٹی ہندی آبادی تے گوجالنگ مننگ کپک۔ او پارے کہ پاکستان نا الس خواری کش، دلیر و سنبرینگوک ءِ و اوفتیٹی تغ تے راستی ٹی بدل کننگ نا پبی لائخی ارے۔ ننا وسیلہ غاک وارخواہی فراوان کیرہ، وخت اس کہ دا وارخواہی تے بھرم آتیٹی بدل کننگ کن ننا الس واک و ارادگی نا حقی بن چکل ءُ۔ تینا تران اٹی او پارے کہ پاکستان ءِ داسہ لائخی آن پیداوار، قول تیاں عملی گام گیج و خام معدنیات نا برآمد آن قدر ودوک آ زرگزرانی شونداری نا کنڈ آ مونی ہنوئی تمک۔ معدنی وسیلہ غاتے بھرمی وڑ اٹ کاریم اٹ اتسا ملک اکن مدامگی زرگزرانی فائدہ دوئی مننگ کیک۔ فیلڈ مارشل سید عاصم منیر تینا تران ءِ پاکستان زندہ باد نا نعرہ غا چٹفے۔