الس ءِ بنداوی آسراتی تا فراوانی حکومت نا اہم انگا ہدف آتیٹی اوار ءِ،وزیراعلیٰ میر سرفراز بگٹی

کوئٹہ، وزیراعلیٰ بلوچستان میر سرفراز بگٹی تون پاکستان اٹی ورلڈ بینک انا کنٹری ڈائریکٹر بولورماامگابازر اوڑدہی کرے، ہراٹی بلوچستان نا شونداری، زرگزرانی سوگوی، و چندی بشخ آتیٹی شونداری کمکاری نا گمان تیا گپ وتران کننگا۔ وزیراعلیٰ ہاؤس نا رداٹ اوڑدہی ٹی تعلیم، جان جوڑی، آبنوشی و انفراسٹرکچر تون اوار اہم بشخ آتیٹی شونداری کمکاری ءِ ودفنگ و صوبہ ٹی برجا و سلاہ ئی شونداری ڈٹ آتیکن شریداری نا گمان تا جاچ ءِ ہلنگا۔ اوڑدہی ٹی چیف سیکرٹری بلوچستان شکیل قادر خان ہم ساڑی ئس۔ داوخت آ ورلڈ بینک انا کنٹری ڈائریکٹر بلوچستان اٹی شونداری کمکاری و چندی بشخ آتیٹی شریداری عمل نا گمان تیٹی است خواہی نا درشانی ءِ کرے۔ داوخت آ وزیراعلیٰ بلوچستان پارے کہ صوبہ ٹی مدامگی شونداری، زرگزرانی سوگوی، و الس ءِ بنداوی آسراتی تا فراوانی حکومت نا اہم ہدف آتیٹی اوار ءِ۔ بلوچستان ناشونداری بیرہ اسہ صوبہ نا شونداری اف بلکن مچ آ پاکستان نا زرگزرانی شونداری و شونہالی کن بنداوی اہمیت تخک۔ وزیراعلیٰ پارے کہ صوبائی حکومت شونداری ڈٹ آتیٹی شفافیت، گچین چاروکی و نتیجہ غاتیا تالان حکمت عملی نا کمک اٹ السی وسیلہ غاتا گچین کاریم اٹ اتنگ ءِ پک کننگ ءِ تانکہ شونداری گام گیج آتا بھرمک دراست الس اسکان سرمننگ کیر۔ اوپارے کہ بلوچستان نا شونداری کن جہانی شونداری شریدار آتتون کمکاری ءِ پین گچین و بھرمی جوڑ کننگ نا گرج ءِ۔ صوبائی حکومت تعلیم، جان جوڑی، آبنوشی و بنداوی پنجر تون اوار چندی بشخ آتیٹی شونداری ڈٹ آتے مونی دننگ کن جہانی ادارہ غاتتون مسختی شریداری نا ستاءِ کیک۔ وزیراعلیٰ پارے کہ بلوچستان اٹی زرکاری و شونداری ڈٹ آتیکن گچین چاگڑد نا فراوانی صوبائی حکومت نا اولیت آتیٹی اوار ءِ وخت اس کہ حکومت ہمو گام گیج آتے مونی دننگ ءِ ہرا صوبہ ٹی زرگزرانی سرجزآتا مونی دننگ، روزگار نا وارخواہی تیٹی ودکی و الس نا زند انا آب اٹی گچینی نا وڑ جوڑ مریر۔