گوادر شار انا اہم شاہراہ و پیدوار ہند آتیا اسٹریٹ لائٹس خلنگا

گوادر، وزیراعلیٰ بلوچستان نا شونداری وژن و پوسکنوڑ شاری آسراتی تا فراوانی نا ارادگی نا رد اٹ گوادر ڈویلپمنٹ اتھارٹی نا چاروکی ٹی شار ءِ روشنا، زیبا و رکھوک جوڑ کننگ کن شار نا اہم شاہراہ، بنجائی کسر وہند آتیا اسٹریٹ لائٹس خلنگا‘ ہراڑان ننکان شاری و سیلانی تے ہن وبر اٹی آسراتی تون اوار شار انا زیبائی ٹی ہم ودکی مسنے۔ خاص وڑ اٹ میرین ڈرائیو ننکان اسٹریٹ لائٹس نا روشنائی و سمندر نا لہر تا گچین اواری آن اسہ زیباءُ ندارہ اس پیش کیک، ہرا ہندی شاری و سیلانی تیکن اسہ است چکوک تفریحی ہند اس جوڑ مننگ اٹی ءِ۔ ادارہ شونداری گوادر توانائی نا رکھ و چاگڑد دوست گام گیج آتا رد اٹ چندی اسٹریٹ لائٹ آتے شمسی توانائی آ ہم گدریفنگانے۔