سعودی عرب نا سلامتی و حرمین شریفین نا رکھ آ ہچ ءُ سمجھوتہ اس کننگپک،ڈی جی آئی ایس پی آر

اسلام آباد، پاک فوج انا شعبہ تعلقات عامہ (آئی ایس پی آر) نا ڈائریکٹر جنرل لیفٹیننٹ جنرل احمد شریف چوہدری سعودی عرب نا سلامتی، وتواجہی و ڈیہہ انا سالمیت نا رکھ اکن تینا نزور مفروک ارادگی نا دوارگی پک ءِ کرسا پیدوار کرینے کہ ساڑی حالیت آتیٹی سعودی عرب نا دفاع کن کل المی دفاعی گام گیج آتے کن سنبرینگوک ءِ۔ ڈی جی آئی ایس پی آر لیفٹیننٹ جنرل احمد شریف چوہدری پارینے کہ مکہ اسیجائی دفاعی سیوت نا رد اٹ جم دفاعی قول آتیا عملدرآمد نا ریسہ بنا کننگ اٹی ءِ، ہراٹی دفاعی تیاری تیٹی ودکی، عسکری لائخی تا دوئی کننگ و ہڑتوم آ ملک آتا نیام اٹ دفاعی کمکاری ءِ پین بھرمی جوڑ کننگ اوار ءِ۔ سعودی اخبار الشرق الاوسط ءِ تروک آ انٹرویو ٹی پاک فوج انا ترجمان لیفٹیننٹ جنرل احمد شریف چوہدری پارے کہ سعودی عرب نا سلامتی و حرمین شریفین نا رکھ پاکستان نا اولیکو و بیدس سمجھوتہ ئی اولیت ءِ۔ سعودی عرب نا بالی اڈہ، شار و شاری و زرگزرانی ماڑی تیا جلہو آک مذمت کڑزرہ انتئے کہ دا جلہو آک سعودی عرب نا وتواجہی، سلامتی و ڈیہہ انا سالمیت کن دراست خطرہ ءُ۔ ڈی جی آئی ایس پی آر پارے کہ مکہ اسیجائی دفاعی سیوت نا رد اٹ عملی دفاعی گام گیج آتیٹی فوج و عسکری لائخی تا دمدستی تعیناتی، دفاعی تیاری نا کہول اٹی ودکی و عسکری ہم گرنچی ءِ سوگو کننگ اوار ءِ۔ دفاعی کمکاری نا رد اٹ انٹیلی جنس شیئرنگ و بیرہ دفاعی وڑ انا کارروائی تیٹی رابطہ کاری ہم کننگک۔ او معلومدار کرے کہ پاکستانی فوجی دستہ غاک مہالو آن سعودی عرب اٹی جتا جتا زمواری تے سر تننگ اٹی ءُ، ہرافتے ٹی دفاعی کمک، ہیلکاری، اسیجائی مشق و عسکری کمکاری اوار ءُ۔ پاکستان دفاعی گرج آتا رِد اٹ فوجی کارندہ، عسکری لائخی‘ ہیلکاری و لاجسٹک کمک نا فراوانی ءِ برجا تخک۔ لیفٹیننٹ جنرل احمد شریف چوہدری پیدوار کرے کہ عسکری سیوت فوجی دستہ غاتا کچ، تعیناتی نا جاگہ و آپریشنل جم پیدوار کیک‘ او پارے کہ پاکستان و سعودی عرب نا نیام اٹ دفاعی کمکاری نا مسخت تین پہ تینی سلامتی و دفاعی لائخی تے سوگو کننگ ءِ۔ پاک سعودی اسیجائی اسٹریٹجک دفاعی معاہدہ نا بابت ڈی جی آئی ایس پی آر پارے کہ دا معاہدہ نا بنداوی مسخت ہڑتوم آ ملک آتا نیام اٹ تین پہ تینی دفاعی کمکاری و اسہ ایلو نا سلامتی ءِ پک کننگ ءِ۔