پاکستان اٹی آبادی ٹی ودکی قومی ایمرجنسی نا دروشم دوئی کرینے،بنجائی وزیر ڈٹ بندی احسن اقبال

اسلام آباد، بنجائی وزیر ڈٹ بندی، شونداری و خصوصی گام گیج پروفیسر احسن اقبال پارینے کہ پاکستان اٹی آبادی ٹی ترندی اٹ ودکی قومی ایمرجنسی نا دروشم تینائی کرینے، وسیلہ و آبادی ٹی بریبری آن بیدس مدامگی شونداری و زرگزرانی شونہالی نا تغ پورو مننگ کپک، دا چیلنج تون مون تننگ کن بنجائی و صوبائی حکومت آتے اسیجائی قومی حکمت عملی اس تینا کروئی مریک۔ نیشنل پاپولیشن کونسل نا ایگزیکٹیو کمیٹی نا اولیکو دیوان آن تران کرسا بنجائی وزیر پارے کہ 1980 آن آبادی ٹی ودکی نا کچ پدریسہ کم مرسا 2.4 درسد اسکان بسوسس، ولے 2023 نا مردم شماری ٹی دا کچ دُوارہ ودسا 2.55 درسداسکان سرمس ہرا گڑتی نا سوب ءِ و دا رجحان ءِ توننگ کن دمدستی گام گیج کروئی مریک۔ احسن اقبال پارے کہ آبادی نا حساب وکتاب بیرہ نمبر اف بلکن پاکستان نا آخبت، ننا چنا و قومی وسیلہ غاتا آخبت تون گنڈوک اہم سوج آک ءُ۔ اگہ ملکی شونداری نا کچ پنچ درسد و آبادی ٹی ودکی نا کچ 2.5 درسد مرے تو حقی شونداری بیرہ دونیم درسد رہینگک ہنداسوب آن آبادی ٹی ودکی نا مون ءِ توننگ آن بیدس تعلیم، جان جوڑی، روزگار و بنداوی آسراتی تا ودوک آ گرج آتے پورو کننگ مشکل مریک۔ اوپارے کہ قومی وسیلہ غاتا بشخنگ نا 82 درسد آبادی تون گنڈوک مننگ اسہ ہندن ءُ تضاد اس ودکی کیک ہرا آبادی ٹی ودکی نا است بڈی نا سوب جوڑ مننگ کیک۔ دارداٹ قومی مالیاتی کمیشن (این ایف سی) ایوارڈ ءِ شونداری و مدامگی نا ٹک آتتون گنڈنگ نا گرج ءِ تانکہ آبادی ءِ بریبر تخنگ کن گچین گام گیج کروک آ صوبہ غاتا است بڈی ءِ کننگ مرے۔