مون انگا زڑدوئی نا چٹفنگ کن مچ آملک اٹی اسکریننگ المی ءِ،بنجائی جان جوڑی وزیر

اسلام آباد، بنجائی وزیر جان جوڑی سید مصطفی کمال ملک آن مون انگا زڑدوئی نا چٹفنگ کن مچ آ ملک انا کہول آ اسکریننگ و گچین حکمت عملی نا گرج آ زور شاغانے۔ حکومت دا چیلنج نا سنگینی ءِ ہم تالان کرینے، ہرانا رداٹ لکھ آ پاکستانی تا مون انگا زڑدوئی نا مرض اٹی اختہ مننگ نا گڑتی ءِ۔ تینا اسہ بیان اسے ٹی راجی کارندہ ڈاکٹر سعید کریم نا رداٹ مون انگا زڑدوئی نا چٹفنگ نا قومی پروگرام ءِ تینا درکار ہدف آتا دوئی کننگ کن ریسہ اٹ برجاتخنگ بھاز المی ءِ۔ باقاعدہ اسکریننگ، دوائی تا بے سلنگ آن فراوانی، پت انا قابل تشخیصی آسراتی، ہیلکار طبی کارندہ و گچین چاروکی نا نظام پروگرام نا مریس مدی سرسہبی ءِ پک کیک۔ اوپارے کہ ہڑدے ئی اجرت آ کاریم کروک آ ہمو بندغ آک ہرا کبین طبی ٹیسٹ و معائنہ نا خڑچ آتے سگنگ کپسہ، تینا خاہوت نا جان جوڑی نا بابت فکر کروک لمہ غاک و ہموبزرگ آک ہرا سال آتیان ٹیسٹ کرفتنو، او کل اکن مفت اسکریننگ و درمان نا آسراتی مرغن ناجوڑی و جان جوڑی نا نیام اٹ فرق پک مننگ کیک۔ ڈاکٹر سعید کریم پارے کہ اگہ وزیراعظم نا قومی مون انگازڑدوئی ایسری پروگرام آ گچین وڑاٹ عملدرآمد کننگے و سوگو ادارہ ئی ارادگی تون اودے آخبتی برجاتخنگے تو دا پاکستان نا جان جوڑی نا بشخ اٹی اسہ اہم بھرم تخوک گام پک مننگ کیک۔ اوپارے کہ داپروگرام نہادی انسانی جان تے بچفنگ، نیزگار خاہوت آتے طبی خڑچ آتا باریم آن خلاسی ترفنگ و پاکستان ءِ مون انگا زڑدوئی آن پاک ملک اس جوڑ کننگ نا ہدف نا پین خڑک اتنگ اٹ اہم کڑد ادا کننگ کیک۔