السی ویل آتا ایسری نا بابت ہچ ءُ ڈیوالئی یا تل ول اس سگپنہ ،ڈی سی جعفرآباد

جعفرآباد، وزیراعلیٰ بلوچستان میر سرفراز بگٹی و چیف سیکرٹری بلوچستان شکیل قادر خان نا پرمان تے عملی دروشم ترسا کمشنر نصیرآباد ڈویژن صلاح الدین نورزئی نا پارت نا رد اٹ ڈپٹی کمشنر جعفرآباد خالد خان نا چاروکی ٹی کشمیر کوٹ اٹی ضلعی انتظامیہ نا کنڈ آن غاو دیوان اڈ ہلک، ہراٹی کل ضلعی محکمہ غاتا سروک و اوفتا نمائندہ غاک بشخ ہلکر۔ غاو دیوان ناوخت آ علاقہ نا الس تینا مون تروک ویل، خواری و غاو تا رد اٹ نوشتہ و زبانی ڈپٹی کمشنر و تعلقدار افسرا تے معلومدار کرے‘ ڈپٹی کمشنر خالد خان نا ساڑی گری ٹی تعلقدار محکمہ غاتا افسرآک السی غاو تیا ورندی تسر و ویل آتا ایسری کن تینا محکمہ غاتا کنڈ آن کروک گام گیج آتیاں معلومدار کریر، وخت اس کہ ڈپٹی کمشنر کیہی غاو تا جاگہ غا نوٹس ءِ ہلسا تعلقدار افسر آتے دمدستی ایسری و المی گام گیج اتا پرمان جاری کرے و پیدوار کرے کہ السی ویل آتا ایسری ٹی ہچ وڑ انا ڈیوالئی و تل ول سگنگ مفک۔ او تعلقدار افسر آتے پارت کرے کہ غاو دیوان اٹی مون تروک غاو تے بیرہ رسمی کارروائی اسکان کچ اٹ تخنگپ بلکہ اوفتیا عملی پیش رفت ءِ پک کننگے تاکہ الس ءِ حقی معنہ اٹ ریلیف رسینگے۔ ڈپٹی کمشنر خالد خان الس تون گپ و تران کرسا پارے کہ وزیراعلیٰ بلوچستان میر سرفراز بگٹی نا کماشی ٹی صوبائی حکومت السی ویل آتا ایسری و بنداوی آسراتی تا فراوانی کن سنجیدہ و عملی گام گیج کننگ اٹی ءِ، غاو دیوان تا اڈ تننگ ہم ہندا الس دوست پالیسی نا ریسہ ءِ تاکہ مخلوق ءِ سرکاری دفتر آتا چکر خلنگ نا جاگہ غا اوفتا درگہ غا بننگے و اوفتا ویل آتے جاگہ غا ایسر کننگ مرے او پارے کہ ضلعی انتظامیہ الس نا خذمت و اوفتا ویل آتا ایسری کن مدام کوشست کننگ اٹی ءِ، السی غاو تا ایسری ننا اولیت آتیٹی اوار ءِ۔ وخت اس کہ کشمیر کوٹ اٹی اڈ ہلوک غاو دیوان نا علاقہ ناالس ستاءِ کرسا ضلعی انتظامیہ نا دا گام ءِ ستا کڑزوک گوندا و اومیت درشان کریر کہ پیش کروک آ ویل آتا ایسری کن عملی گام گیج آتا ریسہ ءِ برجا تخنگک۔