خیبرپختونخوا پولیس نا قربانیک مچ آ قوم اکن گمر نا سوب ءُ، صدر

اسلام آباد، صدر مملکت آصف علی زرداری کوہاٹ اٹی دہشت گرد آتا جلہو اٹی پولیس کارندہ غاتا شہیدی آ است ہسونی نا درشانی ءِ کرسا پارینے کہ امن، سوگوی و سلامتی کن جان تے ندر کروک شہید آتا قربانی تے مدام یات تخنگک۔ ایوان صدر نا پریس ونگ آن پنچ شنبے نادے آ جاری بیان نا رداٹ صدر مملکت دہشتگرد جلہو نا سخت انگا لوز آتے ٹی مذمت ءِ کرے و جلہو اٹی شہید مروک پولیس کارندہ غاتے خراج عقیدت پیش کرے۔ اوپارے کہ دہشت گردی نا برخلاف جنگ اٹی خیبرپختونخوا پولیس نا قربانیک مچ آ قوم اکن گمر نا سوب ءُ۔ صدر مملکت شہید آتا پدخاہوت آتتون ہڑزخواہی و ہمدردی و پورو یکجہتی نا درشانی ءِ کرے۔ اوپارے کہ دہشت گرد آتا جلہو ننا حوصلہ ءِ شیف شاغنگ کپک، ملک آن دہشت گردی نا پورو چٹفنگ کن قوم سوگو سلوک ءِ۔ صدر آصف علی زرداری پارے کہ پولیس وایلو کانود نافذ کروک ادارہ غاتا کارندہ غاک الس نا جان و مال انا رکھ اکن خذمت و قربانی تننگ ءُ۔ صدر مملکت واقعہ ٹی ٹھپی مروک آ پولیس کارندہ غاتا زوت دراخ جوڑی کن نیک است خواہی تا درشانی ءِ کرے۔