یوریا کھد آ رکھ اٹی نرمی نا بھرم بلوچستان نا بزغر آتسکان بایدے رسینگے،سینیٹر محمد عبدالقادر

کوئٹہ، سینیٹر محمد عبدالقادر بلوچستان نا پین 17 ضلع غاتیٹی یوریا کھد انا ہل وتس آ خلوک رکھ ءِ شڑت آتیا ہرفنگ نا فیصلہ نا ستاءِ کرسا اودے بزغرآتا روزگار و کشاری پیدوار نا رکھ اکن اہم گوندانے۔ اوپارے کہ بزغرآتے وخت آ و جوان نہاد آ کھد انا فراوانی ءِ پک کننگے۔ حکومت داہیت انا خاص بست وبند ءِ کے کہ چنکا کشارگر بے گرج کاغدی کارروائی، تل ول و انتظامی مشکل آتیان بیدس دا فیصلہ غان فائدہ ہرفنگ کیر۔ سینیٹر محمد عبدالقادر صوبائی انتظامیہ غا زور شاغا کہ مجاز ڈیلر آتا کمک اٹ کھد انا جوان کچ اٹی دوئی ءِ پک کننگے، نہاد آتا سخت چاروکی ءِ کننگے و کوڑی کننگ و بلیک مارکیٹنگ نا برخلاف گچین کارروائی کننگے۔ اوپارے کہ رکھی گام گیج آک ہندن مریر ہرا کھد انا غلط کاریم اٹ اتنگ ءِ تورر و حقی بزغر آتا گرج آتے ہم پورو کیر۔ اوپارے کہ بلوچستان نا کشارگر آک مہالو آن دِیر انا کاختی، ودوک آ پیداواری خڑچ ومالی وسیلہ غاتا کمتی تون مون تننگ ءُ۔ کھد انا فراوانی ٹی تل ول مچ آ فصل انا سیزن ءِ زہمی کرسا خلقی خاہوت آتا مشکل آتیٹی پین ودکی کننگ کیک۔ سینیٹر محمد عبدالقادر ایلو ضلع غاتیٹی خلوک رکھ آتا ہم جاچ ءِ ہلنگ و ہراڑے مننگ کے، گچین چاروکی تون کھد انا فراوانی نا قابل عمل نظام اس درستی راستی کرفنگ نا خواست کرے۔ اوپارے کہ کشت وکشار نا کمک اصل اٹ غذائی رکھ، خلقی روزگار و ہزار آ خاہوت آتا کٹیا نا رکھ ءِ۔ حکومت دا فیصلہ غا دمدستی و گچین عملدرآمد ءِ پک کے تانکہ بزغرآتے عملی ریلیف رسینگ کے۔