صدر نا مہمند اٹی سیکورٹی پولیس کارندہ غاتیا شہادت آ ارمان

اسلام آباد، صدر مملکت آصف علی زرداری ضلع مہمند نا تحصیل پنڈیالی ٹی پولیو تور مہم ناوخت آ سیکورٹی آ سلوک پولیس کارندہ غاتیا سم کاری نا واقعہ نا سخت انگا لوز آتے ٹی مذمت ءِ کرینے۔ ایوان صدر نا پریس ونگ آن سے شنبے نادے آ جاری بیان نا رداٹ صدر مملکت سم کاری نا واقعہ ٹی پولیس کارندہ غاتا شہیدی آ ڈکھیائی و است ہسونی نا درشانی ءِ کرینے و او شہید پولیس کارندہ غاتا فرض شناسی، بہادری و قومی خذمت آتیا اودے خراج عقیدت پیش کرے۔ صدر آصف علی زرداری پارے کہ چناتے پولیو آن بچفنگ نا قومی مہم اٹی فرض سرتروک کارندہ غاتے شست کننگ بھاز است ہسونی و مذمت نا قابل ءِ۔ صدر مملکت شہید آتا خاہوت آتتون ہمدردی و است ہسونی نا درشانی ءِ کرسا ٹھپی پولیس کارندہ نا زوت جان جوڑی کن دعا کرے۔ صدر مملکت پارے کہ پولیو ٹیم تا رکھ آ سلوک پولیس کارندہ غاتا قومی فرض سرتننگ و اوفتا قربانیک زیان مفسہ۔