پولیو مہم سیکورٹی آ سلوک کارندہ غاتیا سم کاری ءِ سگپنہ، بنجائی وزیرداخلہ

اسلام آباد، بنجائی وزیر داخلہ محسن نقوی خیبرپختونخوا نا ضلع مہمند اٹی پولیو تور ڈیوٹی آ سلوک پولیس کارندہ غاتیا سم کاری نا واقعہ نا سخت انگا لوز آتے ٹی مذمت ءِ کرسا جلہو اٹی شہید مروک اِرا پولیس کارندہ غاتے خراج عقیدت پیش کرینے۔ تعلقدار وزارت آن جاری بیان نا رداٹ وزیرداخلہ شہید آتا پدخاہوت آتتون ہمدردی و است ہسونی نا درشانی ءِ کرے و سم کاری ٹی ٹھپی مروک آ پولیس کارندہ نا زوت و پورو دراخ جوڑی کن دعاکرے۔ تینا اسہ بیان اسے ٹی محسن نقوی پارے کہ پولیو ورکرآتا رکھ آ سلوک پولیس کارندہ غاک ملک انا جان جوڑ و رکھ آخبت کن تینا فرض ءِ سرتننگ ءُ، اوفتیا جلہو اصل اٹ قوم انا آخبت آ جلہو ءِ۔ او سخت لوز آتیٹی پیدوار کرے کہ پولیو ٹیم انا سیکورٹی آ سلوک کارندہ غاتیا سم کاری نا واقعہ ءِ ہچ ءُ حالیت اسے ٹی سگپنہ و لغور کارروائی ٹی اوار زموار آک ہچ ءُ رعایت اسے نا حقدار افس۔ ہرافتے عدالت نا مون آ سلفنگک۔