سائبر سیکورٹی و سوشل میڈیا آگاہی کن قومی کونسل اسے نا گرج ءِ،عطاء اللہ تارڑ

اسلام آباد، بنجائی وزیر حوالکاری وشینکاری عطاء اللہ تارڑ سائبر سیکورٹی نا ودوک آ خطرہ غاتیان، سوشل میڈیا غا رد معلومداری، ڈیپ فیک و آرٹیفیشل انٹیلی جنس نا کمک اٹ تیار کروک گمراہ کروک مواد تون مون تننگ کن نیشنل سائبر سیکورٹی اینڈ سوشل میڈیا آگاہی کونسل جوڑ کننگ نا سلاہ تسینے۔ او پارے کہ ڈیجیٹل دور انا چیلنج آتتون مون تننگ کن قومی کہول آ جوان حکمت عملی، ڈیجیٹل خواندگی و السی آگاہی ءِ شون تننگ المی مسنے۔ بنجائی وزیر حوالکاری پاکستان ٹیلی کمیونیکیشن اتھارٹی نا کنڈآن سائبر سیکورٹی آگاہی ہفتہ 2026ء نا بنائی دود خاص انگا مہمان نا وڑ اٹ تران کرسا پارے کہ ڈیجیٹل خواندگی ءِ اسکول، کالج و یونیورسٹی تا نصاب نا بشخ جوڑ کننگے و دا نصاب ءِ ٹیکنالوجی ٹی ترندی بدلی تا رِد اٹ باقاعدگی اٹ اپ ڈیٹ کننگے۔ عطاء اللہ تارڑ پارے کہ آرٹیفیشل انٹیلی جنس آن تیار کروک مواد نا پیدوار لیبلنگ المی گوندنگک تاکہ صارف آتے سما مرے کہ او ہرا مواد ءِ خننگ اٹی ءُ او حقی ءِ یا آرٹیفیشل انٹیلی جنس نا کمک اٹ تیار کننگانے۔ او پارے کہ سوشل میڈیا پلیٹ فارمز آتیان داسکان بیرہ ٹک ٹاک اے آئی آن تیار کروک مواد نا لیبلنگ ءِ المی گوندنگانے‘ او پارے کہ ملک انا ہر سرکاری ادارہ ٹی ڈیجیٹل خواندگی سیل جوڑ کروئی تمک و سرکاری افسر آتے سائبر سیکورٹی و ڈیجیٹل خواندگی نا بابت باقاعدہ ہیلکاری فراوان کروئی تمک۔ بیرہ اسہ ہفتہ نا آگاہی مہم بھاز اف بلکہ سائبر سیکورٹی و سوشل میڈیا نا رکھوک کاریم اٹ اتنگ کن پدریسہ کوشست آتا گرج ءِ۔ بنجائی وزیر حوالکاری پارے کہ رد معلومداری تا تالانی و اوڑان ودی مروک خطرہ آک ساڑی دور انا بھلا چیلنج آتیٹی اوار ءُ۔ سوشل میڈیا نا بنا و ڈیجیٹل چاگڑد اٹی ترندی اٹ بدلی تا سوب آن گچین ریگولیٹری فریم ورک ٹہیفنگ ہم اسہ بھلو چیلنج اس جوڑ مسنے۔