پولیو نا پورو چٹفنگ حکومت نا اولیکو اولیت آتیٹی اوار ءِ،ڈپٹی کمشنر نصیرآباد وریندر لعل

نصیرآباد، ڈپٹی کمشنر نصیرآباد وریندر لعل چناتے پولیو آن بچفنگ ناپڑی کنفسا قومی پولیو مہم تور نا باقاعدہ افتتاح کرے۔ حوال نا رد اٹ ڈپٹی کمشنر نصیرآباد وریندر لعل پنچ سال اسکان نا وئی انا چناتے پولیو آن بچفنگ کن اوفتے پولیو ناپڑی کنفسا مچ آ ضلع ٹی قومی پولیو مہم تور نا باضابطہ بناءِ کرے۔ دا وخت آ ایس ایس پی نصیرآباد و ڈسٹرکٹ ہیلتھ آفیسر ڈاکٹر ایاز حسین جمالی ہم چناتے پولیو آن بچفنگ ناپڑی کنفیر و مہم نا بناٹی بشخ ہلکر۔ بنائی دود انا وخت آ محکمہ جانجوڑی نا کمامدار آک پولیو مہم نا بابت بست وبندوو ٹیم تا زمواری تیاں معلومدار فراوان کریر‘ دا وخت آ پاننگا کہ مہم نا وخت آ مچ آ ضلع ٹی پنچ سال اسکان نا وئی انا کل چناتے ہر اُراغا ہنسا پڑی کنفنگے تاکہ اسہ چناس ہم دا رکھی مہم آن محروم سلپ۔ ڈپٹی کمشنر وریندر لعل دا وخت آ پارے کہ پولیو اسہ کسفوک و خطرناک ءُ ناجوڑی اسے ہراڑان چناتے مچ زند انا نیم جان مننگ آن بچفنگ کن وخت آ رکھی پڑی کنفنگ بھاز المی ءِ، او لمہ باوہ غاتیا زور شاغا کہ او پولیو ٹیم تتون کمک کیر و تینا پنچ سال اسکان نا وئی انا کل چناتے ہر مہم اٹ پولیو آن بچفنگ نا پڑی المی کنفر۔ او محکمہ جانجوڑی نا افسر و پولیو ٹیم تے پارت کرے کہ مہم اٹ ہر علاقہ، خلق، گلی و و اُرا اسکان رسینگ ءِ پک کننگے، خاص وڑ اٹ مُر انگا علاقہ غاتیٹی چناتیا خصوصی چکار کننگے تاکہ اسہ چنا اس ہم پولیو نا رکھ پڑی تیان محروم سلپ۔ ڈپٹی کمشنر مستی پارے کہ پولیو نا پورو چٹفنگ حکومت نا اولیت آتیٹی اوار ءِ، ہراڑکن ضلعی انتظامیہ، محکمہ جانجوڑیلمہ باوہ و راج انا کل تپہ غاتے اسیجائی وڑ اٹ تینا کڑد ءِ ادا کروئی تمک۔