بلوچستان نا زالکار تیٹی کاروباری بود و تخلیقی کسب نا کمتی اف،ڈاکٹر ربابہ خان بلیدی

کوئٹہ، سلاہکار وزیراعلیٰ بلوچستان زالبول شونداری ڈاکٹر ربابہ خان بلیدی پارینے کہ بلوچستان نا زالبول آتیٹی کاروباری بد و تخلیقی کست نا ہچ ءُ کمتی اس اف، گرج دا ہیت انا ءِ کہ اوفتے جوان پلیٹ فارم، مالی کمک و قومی وجہانی منڈی تسکان رسینگ گیگ فراوان کننگے۔ ویمن انٹرپرینیورز نیٹ ورک نمائش (WEXNET) بیرہ اسہ نمائش اس آخا بلکہ بلوچستان نا زالبول آتے قومی کہول آ درستی راستی کرفنگ و اوفتا مصنوعات آتے جہانی منڈی تسکان رسیفنگ نا کنڈ آ اسہ تاریخی ءُ پیشرفت اسےِ۔ دا خیال آتا درشانی ءِ او بلوچستان یونیورسٹی آف انفارمیشن ٹیکنالوجی، انجینئرنگ اینڈ مینجمنٹ سائنسز (BUITEMS) کوئٹہ ٹی ویمن انٹرپرینیورز نیٹ ورک نمائش WEXNET 2026 نا بنائی دود آن خاص انگا مہمان نا وڑ اٹ تران کرسا کرے۔ اِرا دے ئی نمائش نا بست وبند ءِ ٹریڈ ڈویلپمنٹ اتھارٹی آف پاکستان (TDAP) کوئٹہ بلوچستان بورڈ آف انویسٹمنٹ اینڈ ٹریڈ (BBoIT) و محکمہ زالبول شونداری نا اواری اٹ کرینے، ہراٹی مچ آ بلوچستان آن 100 آن زیات زالبول کاروباری شخصیت آک تینا مصنوعات و کاروباری بود آتتون اوار بشخ ہلنگ اٹی ءُ۔ ڈاکٹر ربابہ خان بلیدی پارے کہ بلوچستان نا زالبول بھلو وخت اسے آن قومی کہول انا دن انگا پلیٹ فارم نا خواستگار ئس ہراڑے او تینا بود‘ مصنوعات و کاروباری وارخواہی تے دنیا نا مون آ پیش کننگ کبر۔ اینو نن پاکستان ءِ بلوچستان اٹی درستی راستی کرفینن و WEXNET نا کمک اٹ دا پاش کلہو تسونن کہ ہندی مصنوعات آتے قومی پلیٹ فارم و جہانی منڈی تسکان رسینگ گیگ فراوان کننگ ننا ہدف ءِ۔ WEXNET پاکستان نا اسٹ انگا قومی نمائش ءِ ہرا خصوصی وڑ اٹ زالبول کاروباری شخصیت و ایکسپورٹرز آتے مونی اتنگ کن اڈ تننگک۔ او پارے کہ وزیراعلیٰ بلوچستان میر سرفراز بگٹی نا وژن نا رِد اٹ زالبول آتا زرگزرانی وتواجہی، کاروباری سرجز آتیٹی اوفتا جوان اواری و زرگزرانی شونداری نا عمل اٹی اوفتا کڑد ءِ سوگو کننگ حکومت نا اولیت آتیٹی اوار ءِ۔ زالبول آتے بیرہ کاروبار بنا کننگ نا ترغیب تننگ بس اف بللکہ اوفتا کاروبار ءِ مدامگی بنداو آ سلفنگ‘ مصنوعات نا تشہیر، مارکیٹ اسکان رسینگ گیگ و مالی وسیلہ غاتا فراوانی کن عملی گام گیج المی ءِ۔