تعلیم، جانجوڑی، کنوئی دیر و ایلو آسراتیک الس نا بنداوی حق ءُ،پارلیمانی سیکرٹری میر محمد خان لہڑی

نصیرآباد، پارلیمانی سیکرٹری برائے ایکسائز اینڈ ٹیکسیشن و صوبائی اسمبلی نا باسک حاجی میر محمد خان لہڑی پارینے کہ ارب روپئی نا بھلا خڑچ اٹ میگا شونداری ڈٹ انا رد اٹ 35 کلومیٹر دراجی منجھو شوری بیرون یونین کونسل بارک آن تحصیل لانڈھی شریف نا کیہی علاقہ غاتسکان بلیک ٹاپ سڑک جوڑ کننگک‘ ہراڑان علاقہ نا ہزار آ الس ءِ فائدہ مریک‘ دا اہم شاہراہ نا تفنگ آن نئے بیرہ خلقی آبادی نا شار تتون رابطہ گچین مریک بلکہ کشارگر آتے تینا کشاری جنس آتے منڈی تسکان رسیفنگ اٹ کمک رسینگک، گچین کاری حلقہ ٹی السی آسودہی، بنداوی آسراتی تا فراوانی و السی ویل آتا ایسری کن شونداری ڈٹ آتیا ترندی اٹ عملدرآمد برجاءِ، ننا اولیکو اولیت الس ءِ بنداوی آسراتی تے اوفتا درگہ غا فراوان کننگ و علاقہ ءِ شونداری و شونہالی نا کسر آ دننگ ءِ، طالب علم آتے تعلیمی ادارہ غاتے ٹی و ناجوڑ آتے ہسپتال آتسکان رسینگ گیگ اٹ ہم نمان آسراتی دوئی مریک‘ وخت اس کہ علاقہ ٹی واپاری سرجز آتے شون رسینگ تون اوار شونداری و شونہالی نا پوسکن ءُ دور اس بنا کیک۔ دا خیال آتادرشانی ءِ او تینا گچین کاری حلقہ نا دورہ نا وخت آ السی ڈل آتتون اوڑدہی ناوخت آ ہیت وگپ کرسا کرے۔۔ حاجی میر محمد خان لہڑی پارے کہ تعلیم، جانجوڑی‘ کنوئی آ سفا انگا دیر‘کسر تا جوڑ کننگ و ایلو بنداوی آسراتی تا فراوانی الس نا بنداوی حق ءِ و نن تینا سیاسی تفکر و السی خذمت نا جوزہ نا رد اٹ بے فرق آن ہر تپہ نا ویل آتے ایسر کننگ کن کوشست کننگ اٹی اُن، انتئے کہ الس ہرا پت انا درشانی ءِ کرینے اودے عملی گام گیج و شونداری ڈٹ آتا وخت آ پوروی نا کمک اٹ پورو کننگ ننا زمواری ءِ۔ او پارے کہ ورنا تیکن روزگار نا وارخواہی تے ودی کننگ و علاقہ ٹی زرگزرانی سرجز آتے ودفنگ کن ہم گام گیج کننگ انگ ءِ۔ وزیراعلیٰ بلوچستان میر سرفراز بگٹی نا وژن نا رِد اٹ الس نا زند انا آب ءِ بڑز کننگ، پدتموک علاقہ غاتے شونداری نا قومی دنگ اٹی اوار کننگ و جم شونہالی کن حکومت عملی گام گیج کننگ اٹی ءِ، ننا کوشست ءِ کہ شونداری نا فائدہ غاک بیرہ منہ علاقہ غاتسکان کچ اٹ سلپسہ بلکہ حلقہ نا ہر خلق، ہر گلی و ہر شاری اسکان رسینگرہ‘ او مستی پارے کہ السی خذمت نا سفر برجا سلک و شونداری ڈٹ آتا چاروکی ءِ کرسا اوفتا وخت آ و آب اٹ پوروی ءِ پک کننگک تاکہ الس ءِ دا ڈٹ آتا فائدہ غاک حقی معنہ اٹ دوئی مننگ کیر۔