دانش اسکول آک ملک انا روشنا آخبت اٹی زرکاری ءُ، آب آ ہچ سمجھوتہ کپنہ،وزیراعظم محمد شہباز شریف

اسلام آباد، وزیراعظم محمد شہباز شریف پارینے کہ ننا چناک ملک انا آخبت ءُ و دانش اسکول آک ملک انا روشنا آخبت اٹی زرکاری ءُ‘ دا اسکول آتیٹی تعلیم نا آب ہچ سمجھوتہ کننگپک‘ وزیراعظم محمد شہباز شریف نا کماشی ٹی مچ آ ملک اٹی دانش اسکول تا تفوئی پیشرفت نا جاچ ءِ ہلنگ کن دیوان اس اڈ ہلک، ہراٹی گلگت بلتستان، آزاد جموں و کشمیر، سندھ و بلوچستان اٹی دانش اسکول تا تفنگ نا رد اٹ مروک پیشرفت آ جم بریفنگ تننگا۔ وزیراعظم پارت کرے کہ دانش اسکول تا تفنگ ءِ پک وخت اٹ پورو کننگ کن کاریم نا رفتار ءِ پین ترند کننگے و تفوئی سرجز آتے 24 گھنٹہ برجا تخنگے تاکہ ڈٹ آتا وخت آ پوروی ءِ پک کننگ مرے۔ شہباز شریف پیدوار کرے کہ دانش اسکول آتیٹی بیرہ بھاز غریب و حقدار خاہوت آتا چناتے میرٹ نا بنداو آ داخلہ تننگک، تاکہ راج انا محروم تپہ غاتا چناتے آب اٹو تعلیم نا بریبر وارخواہی فراوان کننگ مرے۔ وزیراعظم تعلقدار کمامدار آتے پارت کرے کہ دانش اسکول آتیٹی طالب علم آتا تعلیم و ہیلکاری کن آرٹیفیشل انٹیلی جنس (اے آئی) و انفارمیشن ٹیکنالوجی (آئی ٹی) آ تالان پوسکنوڑ تدریسی وڑوڈول درستی راستی کرفنگے، تاکہ طالب علم آتے پوسکنوڑ دور انا خواست آتتون ہمگرنچ کننگ مرے۔ او دانش اسکول آتا بنیادی پنجر، تعلیمی آسراتی و فراوان کروک خذمت آتا معیار نا جاچ ءِ ہلنگ کن تھرڈ پارٹی ویلیڈیشن نا نظام ءِ پک کننگ نا ہم پارت کرے۔ وزیراعظم وزارت مواصلات ءِ گلگت بلتستان و آزاد جموں و کشمیر اٹی جوڑ کروک دانش اسکول آتسکان طالب علم و عملہ کارندہ غاتا آسان رسینگ کن آب اٹو کسر تا نظام تفنگ نا پارت کرسا پارے کہ دا علاقہ غاتیٹی رابطہ کسر تا جوانی ءِ ہم ڈٹ نا اہم بشخ جوڑ کننگے۔ شہباز شریف خیبر پختونخوا نا اوار مروک ضلع (مسکوہی فاٹا) اٹی دانش اسکول تفنگ نا بابت ہم زوت آن زوت جامع حکمت عملی پیش کننگ نا پارت کرے۔ دیوان اٹی بنجائی وزیر احسن اقبال، احد خان چیمہ، عطاء اللہ تارڑ، شزا فاطمہ خواجہ، ڈاکٹر مصدق مسعود ملک و تعلقدار ادارہ غاتا بڑزکو کمامدار آک بشخ ہلکر۔ دیوان زوم آ آن لائن اڈ ہلک۔