سعودی ویژن 2030ء نا رِد اٹ پاکستانی مصنوعات آتے کن بھاز بھلو وارخواہی ساڑی ارے، جام کمال خان

اسلام آباد، پاکستان و سعودی عرب تاریخی ایلمی تعلقداری تے سوگو اقتصادی و واپاری شریداری ٹی بدل کننگ، ہڑتوم آکنڈآن واپاری ءِ ودفنگ و زرکاری نا پوسکن آ وارخواہی تے پٹ و پول کننگ کن کمکاری ءِ پین سوگو جوڑ کننگ آ امنا کرینو۔ ہڑتوم آ ملک آک صنعتی، کشاری، پیداواری و پوسکنوڑ ٹیکنالوجی نا بشخ آتیٹی اسیجائی کوشست آتے ترند کننگ و پرائیویٹ بشخ نا نیام اٹی کاروباری رابطہ غاتے ودفنگ آ ہم زور شاغار۔ بنجائی واپار وزیرِ جام کمال خان تون سعودی عرب نا پوسکن پندار مروک سفیر ڈاکٹر راجح البقمی اوڑدہی کرے، ہراٹی پاکستان و سعودی عرب نا نیام اٹی ہڑتوم آ کنڈ انا واپاری‘ زرکاری و اقتصادی کمکاری نا شون تننگ تون اوار تین پہ تینی استخواہی تا باندات آتیا گپ وتران کننگا۔ اوڑدہی نا وخت آ بنجائی واپار وزیرِ جام کمال خان پارے کہ سعودی عرب نا ویژن 2030ء نا رد اٹ پاکستان کن واپاری و زرکاری نا بھلا وارخواہیک ساڑی ءُ۔ پاکستان نا صنعتی و پیداواری بود سعودی مارکیٹ نا گرج آتے پورو کننگ اٹی اہم کڑد ادا کننگ کیک، وخت اس کہ پاکستانی مصنوعات آتے سعودی منڈی ٹی زیات آن زیات رسینگ گیگ ترفنگ حکومت نا اہم اولیت آتیٹی اوار ءِ۔ او پارے کہ پاکستان نا برآمد اٹی ودکی و اقتصادی تعلقداری تے پوسکن آ بڑزی تسکان رسیفنگ کن سعودی عرب تون پرائیویٹ بشخ انا شریداری ءِ شون تننگ المی ءِ۔ دا رد اٹ صنعتی کمکاری، پوسکنوڑ ٹیکنالوجی نا کاریم اٹ اتنگ و مصنوعات نا آب ءِ جہانی خواست آتا وڑ اٹ گچین کننگ آ خصوصی چکار کننگ انگ ءِ۔ اوڑدہی ناوخت آ ہڑتوم آ ملک آتا نیام اٹی کشاری بشخ اٹی کمکاری ءِ ودفنگ و علاقائی واپاری رابطہ غاتے پین سوگو کننگ نا گمان تیا ہم گپ وتران مس۔ سعودی سفیر ڈاکٹر راجح البقمی پاکستان تون کشاری کمکاری و علاقائی واپاری رابطہ غاتا شون تننگ اٹ استخواہی تا درشانی ءِ کرے۔ دا وخت آ پاکستان و خلیج کمکار کونسل (جی سی سی) نا نیام اٹی آجو واپاری معاہدہ غا زوت دستخط و اونا گچین عملدرآمد نا گمان تا ہم جاچ ءِ ہلنگا۔