دہشت گردی نا برخلاف جنگ بیرہ پاک فوج و دہشت گرد آتا نیام اسکان اف،وزیراعلیٰ میر سرفراز بگٹی

اسلام آباد، وزیراعلیٰ بلوچستان میر سرفراز بگٹی پارینے کہ صوبائی حکومت بلوچستان پولیس ءِ پوسکنوڑ ازباب، آب اٹو ہیلکاری و میرٹ نا بنداو آ تقرری و بدلی تا ہندن ءُ چاگڑد اس فراوان کننگ کن سنبرینگوک ءِ ہراڑے ہچ وڑ انا سیاسی نیام تمنگ یا زورانا گنجائشت مف‘ پولیس افسر آتا تقرری و کسبی زمواری تا سر تننگ اٹی میرٹ ءِ بنداوی اصول جوڑ کننگانے و دا فیصلہ ءِ تینٹ بلوچستان پولیس نا سرکڑدہ غاتے کروئی ءِ کہ ہرا افسر ہرا زمواری کن جوان ءِ۔ میرٹ نا بالادستی خاص وڑ اٹ ورنا چین نا ریاست آ پت ءِ پدی بحال کننگ اٹی اہم کڑد ادا کیک‘ ریاست نا کل تمبہ غاتے تینا عملی کڑد آن بلوچستان نا ورناتے دا کلہو ءِ تروئی تمک کہ اوفتے میرٹ آ بھرتی کننگک، میرٹ آ زمواریک تننگرہ ہرا بے سیاسی نیام تمنگ آن تینا کسبی لائخی تا رِد اٹ خذمت سر تننگ کیرہ۔ دا خیال آتا درشانی ءِ او جمعہ نا دے نیشنل پولیس اکیڈمی اسلام آباد اٹی بلوچستان پولیس اٹی پوسکن تعینات مروک ڈپٹی سپرنٹنڈنٹس آف پولیس (ڈی ایس پیز) نا ہیلکاری پوروی آ اڈ ہلوک دود آن تران کرسا کرے۔ دا وخت آ نیشنل پولیس اکیڈمی نا کمانڈنٹ آئی جی پی سعد بھروانہ سپاسنامہ پیش کرے۔ دود اٹی آئی جی پولیس بلوچستان محمد طاہر خان، بلوچستان پولیس نا ہیلکاری پورو کروک آ افسر، مڈ کیریئر مینجمنٹ کورس انا شریدار‘ پولیس سروس آف پاکستان و نیشنل اکاؤنٹبیلٹی بیورو نا افسر آک ہم ساڑی ئسر۔ وزیراعلیٰ میر سرفراز بگٹی پارے کہ میرٹ و کسبی آجوئی نا مطلب دا اسُل اف کہ پولیس افسر آک تینے الس آن بڑز یا حاکم نا وڑ اٹ تکر۔ پولیس افسر آک ریاست و الس نا خذمتگار ءُ، اوفتے بھاز ایمانداری، شرف و احساسِ زمواری اٹ بلوچستان نا الس نا خذمت ءِ کروئی تمک۔ اینو اوفتا کوپہ غاتیا مستین آن زیات زمواریک مریرہ، انتئے کہ بلوچستان ءِ پورو وڑ اٹ اے ایریا گوندنگانے‘ دا اسہ بھلو زمواری اسے تون اوار اہم ءُ وارخواہی اس ہم ارے و ننے پک کروئی ءِ کہ دا فیصلہ بروک آ نسل آتا گچین آخبت و صوبہ ٹی گچین امن وایمنی کن کننگانے۔ او ہیلکاری پورو کروک افسر آتے پارے کہ اودے یقین ءِ کہ دا ورنا افسر آک تینا کڑد، کسبی وڑ و ڈول‘ زمواری تا سرتننگ و مون تروک چیلنج آتتون جیرت اٹ مون ترسا صوبہ و ملک انا پن ءِ روشنا کیک‘ پولیس نا بنداوی زمواری منظم ڈوہ تا چٹفنگ ءِ‘ ولے ساڑی حالیت آتیٹی دہشت گردی ہم بھلو چیلنج اس جوڑ مسنے۔ دہشتگرد آتا چنکا ٹولیک بیداد و معصوم شاری تا خون نا کمک اٹ پاکستان ءِ بشخ و پانٹ کننگ نا پراگندہ ارادہ تخرہ، ولے بلوچستان حکومت و پولیس دا جنگ آن پدی ہننگ کن تیار اف۔ وزیراعلیٰ پیدوار کرے کہ دہشت گردی نا برخلاف جنگ بیرہ پاک فوج و دہشت گرد آتا نیام اٹی چنکو جنگ اس اف بلکہ دا مچ آ ریاست و راج انا جنگ ءِ‘ ہراٹی سول سوسائٹی، پولیس، بیوروکریسی، سیاست دان و عدلیہ تون اوار کل ادارہ غاتے تینا کڑد ءِ ادا کروئی ءِ‘ بلوچستان پولیس دا جنگ اٹی مون نا پڑ آ سلک و تینا وطن نا دفاع نا زمواری ءِ پورو جیرت و ارادگی اٹ پورو کیک‘ اینو لمہ وطن ءِ دا ورنا افسر آتا لائخی‘ بہادری و قربانی نا جوزہ نا گرج ءِ‘ اودے یقین ءِ کہ بلوچستان پولیس تینا کسبی لائخی و بے مٹ قربانی تا کمک اٹ کودک آ شاری تے شست کروک بیدادی کروک آتے شکست ایتک۔