پولیو نا چٹفنگ ننا کل انا اسیجائی زمواری ءِ، کمشنر سیوی

سیوی، ڈپٹی کمشنر سیوی میجر (ر) الیاس کبزئی نا کماشی ٹی پولیو تور مہم تون تعلقدار دیوان اس اڈ ہلک، ہراٹی محکمہ جانجوڑی‘ جہانی ادارہ جانجوڑی (WHO)، آئی ایس ڈی (ISD)، آغا خان یونیورسٹی (AKU) تون اوار ایلو تعلقدار ادارہ غاتا افسر و نمائندہ غاک بشخ ہلکر۔ دیوان اٹی محکمہ جانجوڑی نا کمامدار آتا کنڈ آن بروک پولیو تور مہم نا بست وبند‘ ٹیم تا ٹہیفنگ، پک کروک ہدف و مہم اٹ کروک گام گیج آتا بابت جم بریفنگ تننگا۔ پاننگا کہ ضلع سیوی ٹی مہم اٹ جم وڑ اٹ 43 ہزار 192 چناءِ پولیو آن بچفنگ نا پڑی کنفنگ نا ہدف پک کننگانے، ہراڑکن 225 موبائل ٹیم، 46 فکسڈ سائٹ و 22 ٹرانزٹ ٹیم خذمت سر ایترہ‘۔ ڈپٹی کمشنر میجر (ر) الیاس کبزئی دیوان آن تران کرسا پارے کہ پولیو تور مہم ءِ سرسہب کننگ کن کل تعلقدار ادارہ و کارندہ غاک پورو است خواہی، خواری و زمواری اٹ تینا زمواری تے سر ایتر۔ او پارت کرے کہ مہم اٹ Same Day Coverage ءِ ہر وڑ اٹ پک کننگے تاکہ اسہ چنا اس ہم پولیو نا پڑی تیان محروم مف۔ او مستی پارے کہ کل ویکسینیٹر آک تینا پک کروک یونین کونسل آتیٹی وخت آ ساڑی مریر و فیلڈ اٹی تینا زمواری تے پورو چکار اٹ سر ایتر‘ لائن ڈیپارٹمنٹ نا مانیٹر مہم اٹ ٹیم تا کارکڑد نا سختی اٹ مانیٹرنگ ءِ کیر، فیلڈ وزٹ آتے پک کیر و ہر وڑ انا ڈیوالئی یا بے پرواہی نا دمدستی رپورٹ کیر۔ ڈپٹی کمشنر پارے کہ پولیو نا چٹفنگ ننا کل انا اسیجائی زمواری ءِ‘ دا قومی زمواری ٹی ہچ وڑ انا ڈیوالئی سگنگ مفک۔ کل تعلقدار محکمہ غاک تین پہ تینی رابطہ و گچین حکمت عملی نا رد اٹ کاریم کیر تاکہ پک کروک ہدف نا سد درسَد دوئی کننگ پک کننگ مرے۔ او محکمہ جانجوڑی‘ ڈبلیو ایچ او، آئی ایس ڈی، آغا خان یونیورسٹی و ایلو تعلقدار ادارہ غاتا نمائندہ غاتیا زور شاغا کہ او مہم نا سرسہبی کن تینا کل لائخی تے کاریم اٹ اتیر و فیلڈ اٹی ٹیم تے مون تروک ویل آتے دمدستی ایسر کیر۔ وزیراعلیٰ بلوچستان نا وژن نا رِد اٹ پولیو آن پاک بلوچستان و چناتا رکھوک و دراخ جوڑ آخبت کن پولیو تور مہم ءِ سرسہب کننگ حکومت بلوچستان نا اولیت آتیٹی اوار ءِ۔