گلگت بلتستان نا شونداری ڈٹ آتیا کاریم ءِ ترند کننگ ءِ پک کننگے، وزیراعظم محمد شہباز شریف

اسلام آباد، وزیراعظم محمد شہباز شریف نا کماشی ٹی گلگت بلتستان اٹی بنجائی حکومت نا برجا شونداری ڈٹ آتیا پیشرفت نا جاچ ءِ ہلنگ کن دیوان اس اڈ ہلک، ہراٹی وزیراعلیٰ گلگت بلتستان امجد علی خصوصی بشخ ہلک دیوان اٹی شونداری ڈٹ آتا وخت آ پوروی، فنڈ آتا فراوانی و عملدرآمد اٹی مروک اڑاند آتے مر کننگ کن المی گام گیج آتیا سجفنگا۔ دیوان نا بنا ٹی گلگت بلتستان نا الس ءِ خراجِ تحسین پیش کننگا ہرافک یکم نومبر آ ڈوگرہ راج آن آجوئی و اوکان پد پاکستان تون اواری نا تاریخی دے ءِ اڈ تننگ اٹی ءُ۔ داوخت آ معلومدار کننگا کہ یکم نومبر آ وزیراعظم شہباز شریف نا گلگت بلتستان دورہ نا گمان ارے‘ دیوان اٹی وزیراعظم نا پارت آ جولائی 2026ء اٹی جوڑ کروک کمیٹی نا رپورٹ ہم پیش کننگا، ہراٹی گلگت بلتستان اٹی برجا بنجائی شونداری ڈٹ آتا ساڑی حالیت، اوفتیا عملدرآمد اٹی مون تروک مشکل و ڈٹ آتے پک کروک وخت اٹی پورو کننگ کن درکار گام گیج آتا جاچ ءِ ہلنگا۔ شریدار آتے گلگت بلتستان اٹی برجا پن بجلی، بنداوی پنجر و شمسی توانائی نا ڈٹ آتیا مروک پیشرفت آن ہم معلومدار کننگا‘ وزیراعظم بنجائی حکومت نا کنڈ آن الس کن بنا کروک 100 میگا واٹ شمسی توانائی ڈٹ ءِ زوت آن زوت پورو کننگ نا پارت کرے‘ دیوان اٹی نلتر پاور پراجیکٹ نا پوروی، دہشت گردی تور انا واکداری ٹی ودکی و ڈیہہ اٹی ڈیجیٹل انفراسٹرکچر نا خلنگ تون تعلقدار باندات آ ہم سجفنگا۔ وزیراعظم شہباز شریف تعلقدار وزارت و ادارہ غاتے پارت کرے کہ گلگت بلتستان اٹی برجا شونداری ڈٹ آتیا کاریم نا رفتار ءِ ترند کننگے و اوفتا وخت آ پوروی کن المی فنڈ آتا فراوانی ءِ پک کننگے او پیدوار کرے کہ ڈٹ آتا پوروی ٹی مون تروک اڑاند آتے اولیتی بنداو آ ایسر کننگے و ادارہ غاتا نیام اٹی گچین رابطہ کاری نا کمک اٹ عملدرآمد نا عمل ءِ ترند کننگے۔ وزیراعظم دا ارادگی نا دوارگی ءِ کرے کہ گلگت بلتستان نا شونداری، الس ءِ بنداوی آسراتی تا فراوانی و اوفتا زند انا آب ءِ گچین کننگ بنجائی حکومت نا اولیت آتیٹی اوار ءِ‘ او تعلقدار کمامدار آتے مستی پارت کرے کہ شونداری ڈٹ، خاص وڑ اٹ توانائی نا ڈٹ آتا پیشرفت نا باقاعدگی اٹ مانیٹرنگ ءِ کننگے تاکہ الس زوت اوفتا بھرم تیان فائدہ ہرفنگ کے‘ دیوان اٹی بنجائی وزیر احسن اقبال، اعظم نذیر تارڑ، علیم خان، مصدق ملک، عطاء اللہ تارڑ، شزا فاطمہ و سردار اویس لغاری، وزیراعظم نا سلاہکار رانا ثناء اللہ و محمد علی تون اوار تعلقدار سرکاری افسرآک بشخ ہلکر۔