پاکستان و سنگاپور نا کمکاری ءِ اقتصادی رابطہ غاتیٹی بدل کننگ نا گرج ءِ،نائب وزیراعظم اسحاق ڈار

اسلام آباد، نائب وزیراعظم و وزیر خارجہ سینیٹر محمد اسحاق ڈار پاکستان و سنگاپور نا نیام اٹ سفارتی تعلقداری تے اقتصادی رابطہ غاتے ٹی بدل کننگ نا گرج آ زور شاغسا پارینے کہ ہڑتوم آ ملک آک تین پہ تینی کمک، زرکاری نا مونی دننگ و اقتصادی سفارت کاری نا کمک اٹ ہڑتوم آ کنڈآتا تعلقداری تے پوسکن آ کہول آ دننگ کیرہ، وخت اس کہ سنگاپور نا وزیر خارجہ ڈاکٹر ویوین بالاکرشنن پارے کہ ہڑتوم آ ملک آتا نیام اٹ کمک نا چندی بشخ آک ساڑی ءُ و واونا دورہ نا مسخت چندی باندات آتیا سرجمی اٹ ہیت و گپ و عملی پیشرفت کننگ ءِ۔ دا خیال آتا درشانی ءِ او وزارت خارجہ ٹی ڈل آتا کہول آ مذاکرات نا بنا غا تینا بنائی ہیت آتیٹی کرے۔ نائب وزیراعظم اسحاق ڈار سنگاپور نا وزیر خارجہ ڈاکٹر ویوین بالاکرشنن ءِ اسلام آباد بننگ آ بخیر کرسا پارے کہ پاکستان و سنگاپور دا سال سفارتی تعلقداری تا جوڑ مننگ نا60 می سال دے ءِ اڈ تننگ ءُ۔ او سنگاپور ءِ آسیان نا رکنیت دوئی کننگ آ مبارکبادی ترسا پارے کہ دا سال سنگاپور کن بھاز اہمیت تخک وخت اس کہ پاکستان ہم کثیرالجہتی کہول آ اہم زمواری تے سنبھالنگ ءِ و شنگھائی کمکار تنظیم نا سروکمملکت ناکونسل نا کماشی ءِ سنبھالانے۔ او مئی 2026 اٹی کوزہ ٹی ہلوک آ سمندری جہاز آتیا سوار پاکستانی شاری تا وطن آ پدی بننگ اٹ سنگاپور نا کمک نا ستاءِ کرسا سنگاپور نا وزیر خارجہ نا خاص منت واری ءِ ہرفے۔ او پارے کہ دا باندات اٹی سنگاپور نا وزیر خارجہ بھاز مہروانی و پبی کمک نا درشانی ءِ کرینے، ہرادے پاکستان قدر انا نظر اٹ ہرک۔ نائب وزیراعظم پارے کہ پاکستان و سنگاپور نا نیام اٹ کمک نا بھلو گمان اس ساڑی ءِ، ہندا سوب آن ہڑتوم آ ملک آتا سفارتی تعلقداری اونا اقتصادی رابطہ غاتے ٹی پورو وڑ اٹ منعکس مفک۔ او تینا 35 سال انا کسبی آزموندہ نا حوالہ ءِ ترسا پارے کہ او تینا زند انا بھلو بشخ اسے اقتصادی وزارت آتیٹی خذمت کرسا گدریفینے و اِرا سال مست وزارت خارجہ نا زمواری تے سنبھالنگ نا اولیکو دے تینا سنگت آتے پیدوار کریسس کہ داسہ اقتصادی سفارت کاری ءِ اولیت تننگک۔