سنگاپور نا وزیر خارجہ نا جی ایچ کیو اٹی فیلڈ مارشل عاصم منیر تون اوڑدہی

راولپنڈی، سنگاپور نا وزیر خارجہ ڈاکٹر ویوین بالاکرشنن جنرل ہیڈ کوارٹرز (جی ایچ کیو) راولپنڈی ٹی آرمی چیف و چیف آف ڈیفنس فورسز فیلڈ مارشل سید عاصم منیر تون اوڑدہی کرے، ہراٹی تین پہ تینی استخواہی تا باندات‘ بدل مروک علاقائی و جہانی سیکورٹی حالیت و پاکستان و سنگاپور نا نیام اٹی کمکاری ءِ پین شون تننگ نا گمان آ گپ وتران کننگا۔ پاک فوج انا شعبہ تعلقات عامہ (آئی ایس پی آر) نا رِد اٹ اوڑدہی ٹی ہڑتوم آ کنڈ انا علاقائی امن و سوگوی نا حالیت آتیا خیال آتا درشانی کننگا‘ وخت اس کہ اسیجائی استخواہی نا بشخ آتیٹی پدریسہ رابطہ و کمکاری نا اہمیت آ ہم زور شاغنگا۔ داوخت آ فیلڈ مارشل سید عاصم منیر سنگاپور تون تعلقداری تے پین سوگو جوڑ کننگ کن پاکستان نا ارادگی نا دوارگی ءِ کرے۔ او پارے کہ علاقائی امن، سوگوی و سیکورٹی نا شونداری کن ادارہ ئی رابطہ غاتے ودفنگ و جوان رابطہ برجا تخنگ اہمیت تخک۔ آئی ایس پی آر نا رِد اٹ سنگاپور نا وزیر خارجہ ڈاکٹر ویوین بالاکرشنن ہم پاکستان تون تعلقداری تے پین سوگو کننگ نا ارادگی نا درشانی ءِ کرے۔ او پاکستان نا سلہہ بند فوج انا کسبی لائخی تا ستا ءِ کرسا علاقائی امن و سوگوی کن پاکستان نا خذمت آتے امنا کرے۔ اوڑدہی ٹی دا ہیت آ امنا کننگا کہ اسیجائی فائدہ غاتا رکھ‘ علاقائی سوگوی و ہڑتوم آ کنڈ انا کمکاری ءِ مونی دننگ کن ہڑتوم آ ملک آتا نیام اٹی رابطہ و ادارہ ئی کمکاری نا ریسہ ءِ برجا تخنگے۔