پاکستانی و چینی زرکار آتا شریداری،گوادر فری زون اٹی شہزاد اینڈ شاؤ فارم انا پن اٹ واپاری ہند انا بنداو تخنگا

گوادر، گوادر فری زون اٹی پاکستانی و چینی زرکار آتا اواری اٹ “شہزاد اینڈ شاؤ فارم” نا بنداو تخنگا۔ ڈٹ ءِ گوادر اٹی زرکاری، کشاری و غذائی بشخ انا شونداری و ہندی ورنا تیکن روزگار نا وارخواہی تا ودی کننگ نا کنڈ آ اہم ءُ پیشرفت اس گوندنگ انگ ءِ۔ بنداو تخنگ نا دود اٹی سیکرٹری وزارت بحری باندات کیپٹن (ر) محمد خرم آغا، چیئرمین گوادر پورٹ نورالحق بلوچ، پارلیمانی سیکرٹری وزیراعلیٰ بلوچستان نسیم الرحمن ملاخیل، پنجاب اسمبلی نا باسک تحسین فواد، چیئرمین چائنا اوورسیز پورٹ ہولڈنگ کمپنی مسٹر یو بو، چیئرمین ضلع کونسل گوادر شے مختار بلوچ، کاروباری شخصیت، وکیل، صحافی، مسڑ طالبعلم‘ استاد و چینی شاریک بشخ ہلکر۔ بنداو تخنگ نا دود آن تران کرسا سیکرٹری وزارت بحری باندات کیپٹن (ر) محمد خرم آغا شہزاد اینڈ شاؤ فارم نا انتظامیہ ءِ مبارکبادی تس و پارے کہ پاکستانی و چینی زرکار آتا دا اواری ہڑتوم آ ملک آتا سنگتی نا عملی درور ءِ۔ او دا اومیت نا درشانی ءِ کرے کہ ڈٹ آن روزگار نا وارخواہیک ودی مریرہ‘ ہندی بندغ آتا فنی ہیلکاری تے ٹی ودکی مریک و پوسکن آ گڑا تے جہانی منڈی اسکان سر کننگ اٹی کمک رسینگک‘ او پارے کہ گوادر فری زون نا بنداوی مسخت بندرگاہ نا خڑک آ صنعتی و پیداواری سرجز آتے شون تننگ و زرکار آتے تعلقدار کانود آتا رد اٹ ٹیکس و کسٹمز نا آسراتی تتون اوار کاروبار نا وارخواہی تا فراوان کننگ ءِ۔ کشت و کشار و فوڈ پراسیسنگ نا بشخ آتیٹی بلوچستان تون اوار ملک انا چندی علاقہ غاتیٹی بھلو وارخواہیک ساڑی ءُ، ہرافتا گچین پراسیسنگ، پیکنگ و کوڑی کننگ نا آسراتی تا کمک اٹ زرگزرانی فائدہ دوئی کننگ مننگ کیک۔ سیکرٹری میری ٹائم افیئرز دا ہیت آ زور شاغا کہ زرکاری نا بھرمک ہندی آبادی اسکان بایدے سر مریر‘ داڑکن ڈٹ انا انتظامیہ ہندی بندغ آتے ملازمت نا فراوانی، اوفتے ہیلکاری تننگ و ہندی سپلائرز و خذمت فراوان کروک ادارہ غاتتون کاروباری تعلقداری جوڑ کننگ ءِ اولیت ایتے۔ او پارے کہ وزارت بحری باندات و گوادر پورٹ اتھارٹی، حکومتِبلوچستان و تعلقدار بنجائی ادارہ غاتا کمک اٹ اٹ زرکار آتے مون تروک ویل، خاص وڑ اٹ دیر، بجلی، ہن و بر نا وسیلہ و انتظامی باندات تون تعلقدار مشکل آتا ایسری کن کاریم ءِ برجا تخرہ۔ چیئرمین گوادر پورٹ نورالحق بلوچ تینا تران اٹی پارے کہ گوادر فری زون نا بنداوی سوچ صنعت و بندرگاہ ءِ اسہ ایلو تون گنڈنگ ءِ، تاکہ واپاری ادارہ غاک گڑا تا پراسیسنگ، پیکنگ و کوڑی کننگ آن پد گوادر پورٹ نا کمک اٹ جہانی منڈی تسکان رسینگ گیگ دوئی کننگ کیر۔