گورنر بلوچستان نا میجر وجاہت وحید نا شہادت آ است ہسونی نا درشانی

کوئٹہ، گورنر بلوچستان جعفر خان مندوخیل پسنی ٹی آئی ای ڈی دھماکہ ٹی شہید مروک میجر وجاہت وحید نا شہادت آ ڈکھ و ارمان نا درشانی ءِ کرینے۔ تینا ہڑزخواہی بیان اٹی گورنر مندوخیل پارے کہ شہید میجر وجاہت وحید وطنِ عزیز نا دفاع کن تینا جان ءِ ندر کرے، مچ آ قوم اونا قربانی آ گمر کیک۔ گورنر جعفر خان مندوخیل پارے کہ شہید آتا دتر زیان مفک و دہشت گردی نا برخلاف جنگ اونا پورو چٹفنگ اسکان برجا سلک۔ گورنر جعفر خان پدخاہوت تون ہمدردی و یکجہتی نا درشانی ءِ کرسا دعا کرے کہ اللہ تعالیٰ شہید ءِ جنت الفردوس اٹی بڑزکو ہند اس عطا کے و پد خاہوت ءِ حوصلہ و صبرِ جمیل عطا کے۔ آمین۔