پاک چین اقتصادی راہداری،بلوچستان نا دیکی روٹ آ 310 ارب روپئی نا شونداری آ کاریم برجا

کوئٹہ، بلوچستان اٹی پاک چین اقتصادی راہداری (سی پیک) نا دیکی روٹ انا رد اٹ شاہراہ تا بھلا شونداری ڈٹ آتیا کاریم برجاءِ، ہرافتا مسخت صوبہ ٹی پوسکن آ مواصلاتی نظام ءِ شون تننگ، واپاری سرجز آتے ودفنگ و زرکاری نا پوسکن آ وارخواہی تا ودی کننگ ءِ۔ سرکاری حساب کتاب نا رِد اٹ، دیکی روٹ آ جم وڑ اٹ 718 کلومیٹر بھلا شاہراہ تا ڈٹ آتیا پیشرفت برجاءِ، وخت اس کہ دا ڈٹ آتیکن جتا کروک فنڈ آتیان 163.17 ارب روپئی جاری کننگانو۔ حساب کتاب نا رِد اٹ، خضدار کچلاک شاہراہ نا 330 کلومیٹر بھلا ڈٹ اکن 82.6 ارب روپئی جتا کننگانے۔ ہندا وڑ ہوشاب، آواران، نال، بسیمہ، خضدار و ژوب، کچلاک روٹ آتیکن جتا کروک 83.2 ارب روپئی آن 54.9 ارب روپئی جاری کننگانو۔ بلوچستان نا اہم مواصلاتی کسر تیٹی بسیمہ و خضدار روٹ ءِ ہم خصوصی اہمیت دوئی ءِ، ہراڑے جتا کروک فنڈ آتا 94 درسد شونداری کاریم تیا خڑچ مننگ نا حوال ءِ۔ دا ڈٹ آتا پوروی آن علاقہ غاتا نیام اٹی سفری رابطہ غاتیٹی گچینی‘ مال و گڑاتا ہن و بر اٹی آسانی و کاروباری سرجز آتیٹی ودکی نا کسر آوار مننگ نا اومیت ارے۔ سی پیک نا دیکی روٹ آ شاہراہ تا تفنگ بلوچستان ءِ قومی واپاری نیٹ ورک تون گچین وڑ اٹ گنڈنگ نا کنڈ آ اسہ اہم ءُ پیشرفت اسے۔ پوسکن آ سڑک آتا کمک اٹ کشاری پیداوار، ہندی صنعت و واپاری گڑاتا رسینگ ءِ آسراتی ملنگ کیک، وخت اس کہ مُر انگا علاقہ غاتسکان رسینگ گیگ گچین مننگ آن روزگار و زرکاری نا گمانک ہم ودنگ کیرہ۔ شونداری ڈٹ آتا وخت آ پوروی و اوفتا گچین کاریم اٹ اتنگ آن بلوچستان نا زرگزرانی شونداری، علاقائی رابطہ کاری و اوپاری اہمیت اٹی ودکی نا اومیت کننگ انگ ءِ