غیر حاضر استاد آتا تنخواہ تیان کٹوتی تون اوار کارروائی ہم کننگک، ڈپٹی ڈسٹرکٹ ایجوکیشن آفیسر ماشکیل

ماشکیل، ڈپٹی ڈسٹرکٹ ایجوکیشن آفیسر ماشکیل عبدالرازق ساسولی جتا جتا اسکول آتا دورہ ءِ کرے ہراڑے او استاد آتا حاضری، تدریسی سرجز، تعلیمی آب‘ اسکول آتیٹی سفائی وطالب علم آتے فراوان کروک تعلیمی آسراتی تا جاچ ءِ ہلک۔ دا وخت آ او استاد آتے تینا کسبی زمواری تے گچین وڑ اٹ سر تننگ و طالب علم آتے آب اٹو تعلیم فراوان کننگ نا پارت کرے۔ ڈی ڈی ای او عبدالرازق ساسولی پیدوار کرے کہ غیر حاضر استاد آتا تنخواہ تیان کٹوتی تون اوار اوفتا برخلاف محکمانہ کارروائی ہم کننگک‘ او غیر حاضر استاد آتے پارے کہ او کسر آبریر تینا زمواری تا احساس ءِ کیر و سٹی غیر حاضری آن پاناد کرسا تینا حاضری و تدریسی زمواری تے پک کیر۔ او پارے کہ سرکاری تعلیمی ادارہ غاک قوم انا آخبت نا بنداو ءُ و دا ادارہ غاتیٹی خوانوک چناتے آب اٹو تعلیم فراوان کننگ استاد آتا بنداوی زمواری ءِ۔ استاد آتا بے پرواہی و ڈیوالئی آن طالب علم آتا نہادی وخت زیان مریک ہرانا منفی زہم چناتا تعلیمی آخبت آ تمک۔ دا سوب آن المی ءِ کہ کل استاد آک تینا زمواری تے پورو ایمانداری، خواری و سخت اٹ سر ایتر۔ ڈی ڈی ای او ماشکیل استاد آتے مستی پارت کرے کہ او اسکول آتیٹی گچین تعلیمی چاگڑد، سفائی و نظم و ضبط ءِ پک کیر تاکہ طالب علم آتے تعلیم دوئی کننگ کن اسہ گچین ءُ چاگڑد اس دوئی مرے‘ او پارے کہ اسکول آتا سفائی، طالب علم آتا جانجوڑی و تعلیمی ادارہ تا نظم و نسق ہم تدریسی عمل نا اہم بشخ ءُ ہرافتے ہچ حالیت اٹی گوجالنگ مفک۔ او دا ہیت آ ہم زور شاغا کہ استاد آک تینا زمواری تے بیرہ حاضری خلنگ اسکان کچ اٹ کپس بلکہ طالب علم آتا تعلیمی واکداری ءِ گچین کننگ، اوفتا اخلاقی ہیلکاری و ہیل کننگ نا لائخی تے شون تننگ آ خصوصی چکار کیر، خاص وڑ اٹ ہمو چناتیا زیات خواری کننگے ہرافک تعلیمی وڑ اٹ نزور ءُ یا ہرافتے تعلیم نا دوئی کننگ اٹی مشکل مون تروئی تمک تاکہ ہچ ءُ چنا اس تعلیمی پڑ اٹ پد تمپ۔ عبدالرازق ساسولی پارے کہ استاد آتا اصل سرسہبی بیرہ اسکول اٹی ساڑی گری اف بلکہ چناتے گچین تعلیم و ہیلکاری فراوان کننگ ءِ۔ استاد آک بایدے طالب علم آتا تعلیمی کارکڑد نا مدامگی اٹ جاچ ءِ ہلیر، اوفتا مشکل آتے پہہ مریر و اوفتا ایسری کن کوشست کیر۔ او مستی پارے کہ محکمہ تعلیم اٹی نظم و ضبط نا گچینی‘ تدریسی آب اٹ ودکی و سرکاری اسکول آتا کارکڑد ءِ گچین جوڑ کننگ کن چاروکی نا عمل برجا تخنگک۔ ڈیوالئی کروک کارندہ غاتا برخلاف قاعدہ و ضابطہ نا رِد اٹ کارروائی کننگک وخت اس کہ تینا زمواری تے گچین وڑ اٹ سر تروک استاد آتا است بڈی ہم المی ءِ‘ گڈسر اٹ ڈی ڈی ای او ماشکیل عبدالرازق ساسولی استاد آتیا زور شاغا کہ او چناتا روشنا آخبت ءِ تینا اولیکو اولیت جوڑ کیر، تینا حاضری ءِ پک کیر و تعلیم و ہیلکاری نا آب ءِ گچین جوڑ کننگ کن عملی گام گیج کیر انتئے کہ آب اٹنگا تعلیم اسہ حکمت عملی‘ شون ہلوک و شونہال راج اسے نا ضمانت ءِ۔ (نصیر کبدانی/نامہ نگار)