پنجگور اٹ اسہ دے ئی اِلار و زیتون میلہ، چندی وڑک نشان تننگار

پنجگور، پنجگور اٹی اسہ دے ئی اِلار و زیتون میلہ اڈ ہلک، جتا جتا وڑ انا اِلار تا نمائش، ہندی کہول آ اِلار و زیتون آن تیار کروک پراڈکٹ الس نا خاص چکار نا ہند جوڑ مس، اسٹال آتیٹی بھاز رش ئس۔ کمانڈنٹ پنجگور رائفلز و ڈپٹی کمشنر میلہ نا فیتہ ءِ کاٹ کرسا باقاعدہ بناءِ کریر۔ دا وخت آ ڈپٹی کمانڈنٹ پنجگور رائفلز، وائس چانسلر مکران یونیورسٹی پنجگور، اسسٹنٹ کمشنر و ایلوفک ساڑی ئسر۔ میلہ نا بست و بند ایڈیشنل ڈپٹی کمشنر پنجگور نظام رحیم نا زمواری ٹی ئس۔ لس کشارگر تتون اوار کالج، یونیورسٹی و اسکول آتا طالب علم، محکمہ کشت وکشار نا افسر، چاہندار و ایلو سرکاری محکمہ غاتا سروک آک میلہ ٹی ساڑی ئسر۔ ضلعی انتظامیہ نا کنڈ آن اڈ ہلوک اِلار و زیتون میلہ نا اڈ تنگ آن نئے ہندی پیداوار اِلار و زیتون نا پبلسٹی مریک بلکہ دا وڑ انا پروگرام تیان کشارگر تا ہم است بڈی مننگ کیک ہرافک اِلار و زیتون تون تعلقدار ءُ۔ پنجگور اٹی ضلعی کہول آ اِلار و زیتون میلہ نا وخت آ چندی شخصیت آک دا وڑ انا پروگرام آتے وخت انا گرج گوندسا پاریر کہ پنجگور اٹی اسہ سد آن زیات وڑ انا اِلار ارے‘ موزاتی ہرا تمر پنجگور نا پن اٹ درست مریک‘ ملکی و جہانی منڈی تیٹی اونا بھلو خواست اسے۔ ہندا وڑ زیتون ہم بھلوا کہول اسے آ ارے‘ مسہ نیم لکھ نا خُڑک درخت خلنگانو ہرافک میوہ تننگ ہم بنا کرینو۔ (نامہ نگار)