شیفکو عدلیہ انصاف نا نظام اٹی مخ آنبار ءِ‘چیف جسٹس یحییٰ آفریدی

اسلام آباد، چیف جسٹس آف پاکستان جسٹس یحییٰ آفریدی پارینے کہ الس ءِ وخت آ و بھرمی انصاف نا فراوانی عدلیہ نا بنداوی زمواری ءِ‘ عدالتی نظام اٹی جوانی کن ڈغاری راستکی تے پہہ مننگ و ضلعی عدالت آتے درکار وسیلہ غاتے فراوان کننگ المی ءِ‘ شیفکو عدلیہ انصاف نا نظام اٹی مخ آنبار ءِ‘ و خواری تیان پد ہم زمواری تے سر تروک عدالتی افسر آتیا اودے گمر ءِ۔ اسلام آباد اٹی عدالتی نظام اٹی جوانی و الس ءِ دمدستی انصاف نا فراوانی نا سرحال آ اڈ ہلوک قومی کانفرنس آن تران کرسا چیف جسٹس یحییٰ آفریدی پارے کہ کل ادارہ غاتے تینا زمواری تے جوان وڑ اٹ سرتروئی مریک۔ ورنا جج آک گچین وڑ اٹ انصاف نا فراوانی ءِ پک کیر و تینا زمواری تے ایمانداری اٹ سر ایتر۔ چیف جسٹس پارے کہ ضلعی عدالت آک انصاف نا نظام اٹی تمبہ نا حیثیت تخرہ، ہندا سوب آن ضلعی عدالت و ہائیکورٹ تا نیام اٹی ہمگرنچی ءِ پین سوگو کروئی تمک۔ ضلعی عدالت آک انصاف نا فراوانی کن درکار گرج آتا لر ءِ فراوان کیر تاکہ اوفتا گرج آک پورو کننگر۔ او پارے کہ مچ آ ملک اٹی جامع و بھرمی دادرسی نا نظام نا اڈ تننگ کن عدلیہ نا گرج آتے پورو کننگک۔ عدالتی افسر آتا آسراتی و نوکری نا شڑت آتیٹی ہم گرنچی کن کمیٹی اس جوڑ کننگانے،خت اس کہ مچ آ پاکستان نا جوڈیشل افسر آتیکن ہیلتھ انشورنس نا آسراتی فراوان کننگ نا فیصلہ کننگانے۔ جسٹس یحییٰ آفریدی پارے کہ جج آتے پیشن نا زور آن آجو تخنگ کن ضابطہ اخلاق اٹی بدلی کننگانے و عدالتی افسر آتے پیشن نا یا انتہا پسند آتا زور شاغنگ آن رکھ فراوان کننگ کن باقاعدہ وڑ وڈول ءِ پک کننگانے۔