پاکستان ترکمانستان اسیجائی بین الحکومتی کمیشن نا دیوان نا تیاری تیا بین الوزارتی دیوان
اسلام آباد، نائب وزیراعظم اسحاق ڈار نا کماشی ٹی پاکستان ترکمانستان اسیجائی بین الحکومتی کمیشن نا دیوان نا تیاری تیا بین الوزارتی دیوان اڈ ہلک۔ پاکستان ترکمانستان اسیجائی بین الحکومتی کمیشن نا بروک آ دیوان ہڑتوم آ ملک آتا وزیر خارجہ غاتا اسیجائی کماشی ٹی مریک۔ ترجمان دفتر خارجہ نا رِد اٹ دیوان اٹی سلاہ ئی ایجنڈا، تین پہ تینی معاہدہ و انتظامی باندات نا جاچ ءِ ہلنگا۔ پاکستان و ترکمانستان نا نیام اٹ واپاری‘ توانائی و ڈیہہ انا رابطہ غاتا شون تننگ آ گپ وتران کننگا۔ انفارمیشن ٹیکنالوجی، کشت وکشار‘ ٹیکسٹائل و جانجوڑی نا بشخ آتیٹی کمکاری ءِ ودفنگ آ سجفنگا‘ تعلیم، سیل سوات‘ و ربیدہ نا بشخ آتیٹی کمکاری ءِ مونی دننگ آ ہم گپ و تران مس۔ وزیر خارجہ اسحاق ڈار پارے کہ اسیجائی بین الحکومتی کمیشن پاکستان و ترکمانستان نا کمکاری نا شون اٹی اہم کڑد ادا کیک۔ تعلقدار وزارت آک رابطہ کاری و جم تیاری تے پک کیرہ دیوان اٹی سیکرٹری خارجہ، سیکرٹری اقتصادی باندات ڈویژن، ترکمانستان اٹی پاکستانی سفیر و تعلقدار وزارت آتا سینئر کمامدار آک بشخ ہلکر۔