بلوچستان اٹی سیکورٹی فورس آتا آپریشن، 8 دہشت گرد خلنگار، میجر و حوالدار شہید
کوئٹہ، بلوچستان نا جتا جتا علاقہ غاتیٹی سیکورٹی فورس آتاکارروائی تے ٹی 8 دہشتگرد خلنگار‘ وخت اس کہ دہشتگرد آتا سلہہ بند کواڈ کاپٹر ناکمک اٹ جلہو اٹی پاک فوج انا میجر عمر منہاس ناصر و حوالدار محمد عدنان خان شہید مسر۔ آئی ایس پی آر نا رِد اٹ 13 نومبر آن بلوچستان نا جتاجتا علاقہ غاتیٹی دہشتگرد آتا برخلاف انٹیلی جنس بیسڈ آپریشن آک برجا ءُ۔ پاک فوج نا شعبہ تعلقات عامہ (آئی ایس پی آر) نا رِد اٹ 13 و 14 نومبر نا نیامی نن کولپور اٹی سیکورٹی فورس آک انٹیلی جنس بیسڈ آپریشن کریر‘ ہراٹی 8 دہشتگرد ءِ خلنگا‘ کارروائی ٹی بھلو کچ اسے ٹی سلہہ ومنچر ہم دوئی کننگا۔ آئی ایس پی آر نا رِد اٹ کولپور، کردگاپ و نوشکے نا ایب کیب اٹی دہشتگرد آتا برخلاف انٹیلی جنس بیسڈ آپریشن کننگ انگ ءِ‘ وخت اس کہ علاقہ ٹی سیکورٹی نا حالیت ءِ برجا تخنگ کن کوئٹہ تفتان قومی شاہراہ این 40 آ گشت ہم برجا ءِ۔