قائداعظم ؒ نا کل آن بھلا میرات پاکستان نا رکھ ننا زمواری ءِ،وزیراعلیٰ میر سرفراز بگٹی

کوئٹہ، وزیر اعلیٰ بلوچستان میر سرفراز بگٹی بانی پاکستان قائداعظم محمد علی جناحؒ نا کزیہ دے آ تینا کلہو اٹ پارینے کہ قائداعظم نا پاکستان ننا چین تا امانت ءِ، ہرا نا سوگوی، استحکام و شونہالی بانی پاکستان ءِ حقی خراجِ عقیدت پیش کننگ نا گچین ءُ وڑ اسے۔ وزیر اعلیٰ پارے کہ قائداعظم محمد علی جناحؒ نا کل آن بھلا میرات پاکستان ءِ۔ او تینا سیاسی جہد ءِ تینا جندی فائدہ غاتیان ایڑتر تخسا اسہ قومی مسخت اسے کن وقف کرے و تینا سیاسی بصیرت، اصول پسندی و ثابت قدمی اٹ برصغیر نا مسلمان تیکن اسہ آجو ریاست اسے نا جوڑ کننگ نا کسر ءِ آوار کرے۔ میر سرفراز بگٹی پارے کہ ریاست آک بیرہ نعرہ غاتے اٹ سوگو مفسہ بلکن آئین و کانود نا بالادستی، سوگو ادارہ، زموار سروکی و شاری تا بنداوی حق آتا رکھ آن سوگو مریرہ۔ قائداعظم نا اصول اینو ہم پاکستان ءِ مون تروک چیلنج آتا مون ءِ تننگ کن عملی راہشونی اس فراوان کیرہ۔ او پارے کہ قائداعظم نا پاکستان اٹ ہر صوبہ و ہر شاری ءِ بریبر عزت، وارخواہی و حق دوئی ءِ۔ قومی یکجہتی ہمو وخت آسوگو مریک ہراتم ملک انا کل بشخ و شاری تے شونداری نا اسہ وڑ وارخواہی دُو برے و ریاستی باندات آتیٹی انصاف و میرٹ ءِ بنداوی حیثیت دوئی مرے۔ وزیراعلیٰ بلوچستان پارے کہ کانود نا بالادستی، دیانتداری و نظم و ضبط قائداعظم نا بنداوی اصول آتیٹی اوار ئسر۔ ساڑی دور اٹ دا اصول آتیا عمل کننگ بیرہ قومی فرض اف بلکن پاکستان نا آخبت ءِ رکھ کننگ نا گرج ہم ارے۔ میر سرفراز بگٹی پارے کہ پاکستان نا شونداری کن قومی یکجہتی و اجتماعی زمواری نا جوزہ ءِ مون آ دروئی مریک۔ سیاسی و راجی اختلاف آتیان پد ہم ملک انا گیشتر فائدہ ءِ مقدم تخنگ و قومی ادارہ غاتے سوگو کننگ اسہ سوگو پاکستان نا بنداو جوڑ مننگ کیک۔ او پارے کہ قائداعظم نا کزیہ دے ننے بیرہ اونا عظیم جہد ءِ یات کننگ نا وارخواہی تفک بلکن تینا آخبت نا بابت قومی قول انا پوسکنی نا خواست ءِ ہم کیک۔ ننے قائداعظم نا فکر آتے عملی زند اٹ اوار کننگ اٹ اسہ ہندن ءُ پاکستان اسے نا جوڑ کننگ کن تینا کڑد ءِ ادا کروئی مریک ہراڑے انصاف، میرٹ، کانود نا حکمرانی و بریبر وارخواہی تے پک کننگے۔ وزیر اعلیٰ پارے کہ ورناک پاکستان نا آخبت ءُ و اوفتے تعلیم، کسب و مونی دننگ نا وارخواہی فراوان کننگ ملک انا روشنا آخبت نا ضمانت ءِ۔ اسہ لائخ و واکدار ورنا چین پاکستان ءِ شونداری و شونہالی نا پوسکن آ منزل آتسکان سر کننگ کیک۔ میر سرفراز بگٹی پارے کہ قائداعظم جسمانی وڑاٹ اینو نن تون اوار اف، ولے اونا جوڑ کروک پاکستان و اونا اصول اینو ہم قوم اکن کسر نا ڈیواءُ۔ بانی پاکستان نا فکر آتے عملی کڑد اٹ بدل کرسا پاکستان ءِ اسہ سوگو، شونہال و باوقار ریاست اس جوڑ کننگ مریک۔ وزیراعلیٰ بلوچستان بانی پاکستان قائداعظم محمد علی جناحؒ کن بخشش نا دعا کرسا پارے کہ اللہ تعالیٰ اودے جنت الفردوس اٹ بڑز ءُ ہند اس عطا کے و قوم ءِ اونا اصول آتیا عمل کرسا پاکستان نا جوڑ کننگ و شونداری اٹ تینا کڑد ءِ ادا کننگ نا توفیق ایتے۔