صوبہ ٹی سرکاری یونیورسٹی تا بابت منفی تاثر نا چٹنگ گمری ءُ ہیت اسے،گورنر بلوچستان جعفرخان مندوخیل

کوئٹہ، گورنر بلوچستان جعفرخان مندوخیل نا کماشی ٹی لسبیلہ یونیورسٹی آف واٹر اینڈ میرین سائنسز نا 9 می سینیٹ دیوان اڈ ہلک ہراٹی یونیورسٹی نا دوئی کروک نمان سرسہبی، تعلیمی و پٹ وپولی سرجز، انتظامی باندات و آخبت نا شونداری ڈٹ آتا جم جاچ ءِ ہلنگا۔ دیوان اٹی بلوچستان ہائی کورٹ نا جسٹس سردار احمد حلیمی، صوبائی وزیر پی اینڈ ڈی ظہور احمد بلیدی، وائس چانسلر پروفیسر ڈاکٹر عبد المالک ترین، صوبائی سیکرٹری ہائر ایجوکیشن ہاشم خان غلزئی، پارلیمانی سیکرٹری زرین مگسی، پرنسپل سیکرٹری ٹو گورنر بلوچستان عبدالناصر دوتانی، ہائر ایجوکیشن کمیشن نا نمائندہ ڈاکٹر ظہور احمد بازئی، پرو وائس چانسلر ڈاکٹر الہی بخش، فنانس ڈیپارٹمنٹ نا ڈپٹی سیکرٹری و رجسٹرار ڈاکٹر بالاچ بلوچ تون اوار سینیٹ نا کل باسک آک بشخ ہلکر۔ گورنر بلوچستان جعفرخان مندوخیل سینیٹ دیوان نا کماشی ءِ کرسا پارے کہ دا نن کل اکن گمر نا ہیت اسے کہ تدوک آ اِرا سال اٹ بلوچستان نا کل پبلک سیکٹر یونیورسٹیک تینا گچین کارکڑد، شفافیت و ادارہ ئی اصلاحات نا سوب آن صوبہ نا سرکاری یونیورسٹی تا بابت تخوک منفی تاثر ءِ بدل کرسا اسہ ستا کڑزوک و اومیت تروک دروشم اس مونی ایسنو۔ او پارے کہ لسبیلہ یونیورسٹی آف واٹر اینڈ میرین سائنسز دا مثبت بدلی نا اسہ روشنا ءُ درور اسے۔ جامعہ تینا کارکڑد نا رینکنگ اینڈ اسکورنگ ءِ 41 درسَد آن ودفسا 85.32 درسَد اسکان سر کننگ و اسہ سال اٹی 86 ملین نا بچت کرسا نئے بیرہ نمان کارکڑد نشان تس بلکہ اسہ پوسکن ءُ تاریخ اس ہم نوشتہ کرے ہراڑکن وائس چانسلر ڈاکٹر عبد المالک ترین و اونا مچ آ ٹیم ستا کڑزک۔ دا سرسہبی دا ہیت انا شاہدی ءِ کہ وژنری سرکڑدہ، میرٹ آ عملدرآمد‘ مالیاتی شفافیت و ادارہ ئی ڈسپلن نا کمک اٹ کچ اٹنگا وسیلہ غاتیٹی ہم بھلا ہدف آتے دوئی کننگ مریک۔