السی جاگہ غاتے پنڈوک آتیان پاک کننگ کن گام گیج کننگ انگ ءِ ڈائریکٹر جنرل سوشل ویلفیئر بلوچستان

کوئٹہ، ڈائریکٹر جنرل سوشل ویلفیئر بلوچستان میر سیف اللہ خان کھیتران پارینے کہ وزیر اعلیٰ بلوچستان میر سرفراز بگٹی و صوبائی وزیر سوشل ویلفیئر بلوچستان نا خصوصی پارت آتارداٹ محکمہ سوشل ویلفیئر بلوچستان ضلعی انتظامیہ نا کمک اٹ کسبی پِنڈنگ ناچٹفنگ و السی جاگہ غاتے پنڈوک آتیان پاک تخنگ کن گچین گام گیج کننگ ءِ۔ دا رد اٹ اسیجائی کارروائی ٹی 5 زالبول آتون اوار 9 کسبی پنڈوک آتے دزگیر کننگانے۔ دا خیال آتا درشانی ءِ او ”اے پی پی“ تون گپ وتران کرسا کرے۔ او پارے کہ محکمہ سوشل ویلفیئر نا بنداوی مسخت راج انا حقدار، نزورو خاص بندغ آتا راجی آسودہی، بحالی و اوفتے راج انا عزتدار و وتواجہ بشخ اس جوڑ کننگ ءِ، ولے کسبی پِنڈنگ اسہ راجی ویل اسے ہرانا توننگ کن تعلقدار ادارہ غاتون اواری اٹ پبی کڑد ادا کننگ انگ ءِ۔ڈی جی سوشل ویلفیئر بلوچستان میر سیف اللہ خان کھیتران پارے کہ اصل سوشل ویلفیئر ڈیپارٹمنٹ ہر حال اٹ تینا کڑد ءِ ادا کیک و راج انا حقی حقدار بندغ و کسبی پنڈنگ اٹی اوار زموارآتا نیام اٹ پرخ ءِ خنسا آسودہی گام گیج آتے پین گچین جوڑ کننگک۔ او پارے کہ محکمہ سوشل ویلفیئر بلوچستان بیرہ کسبی پنڈنگ نا توننگ بلکن حقدار بندغ آتا بحالی، راجی رکھ و اوفتے عزتدار روزگار نا وارخواہی فراوان کننگ کن ہم گام گیج کننگ ءِ۔ او پیدوار کرے کہ ہمو بندغ آک ہرا حقی وڑ اٹ کمک و بحالی نا حقدار ءُ، محکمہ اوفتا گرج آتا جاچ ءِ ہلسا اوفتے دوئی آسودہی پروگرام آتیان فائدہ ہرفنگ کن تینا کڑد ءِ ادا کیک۔دا رد اٹ اسسٹنٹ کمشنر بروری کاشف امر، اسسٹنٹ کمشنر پنجپائی عبدالقیوم و سوشل ویلفیئر آفیسر عبدالرزاق نا سروکی ٹی شہباز ٹاؤن و جناح ٹاؤن نا چارمہ کنڈچندی جاگہ غاتیا اسیجائی کارروائی کننگا، ہراٹی کسبی پنڈنگ اٹی اوار بندغ آتے دزگیر کننگا۔ میر سیف اللہ خان کھیتران مستی پارے کہ السی جاگہ، بازار، شاہراہ و ایلو اہم جاگہ غاتیا کسبی پنڈنگ نا توننگ کن محکمہ سوشل ویلفیئر و ضلعی انتظامیہ نا نیام اٹ کمک ءِ پین سوگو کننگک۔ او پارے کہ دا عمل نا مسخت بیرہ کارروائی کننگ اف بلکن راج اٹ ساڑی حقی حقدار بندغ آتا شناخت، اوفتا بحالی و اوفتے عزتدار زند انا کنڈ آ پدی اتنگ ہم ارے۔او پارے کہ سوشل ویلفیئر ڈیپارٹمنٹ و ضلعی انتظامیہ نا کنڈآن کسبی پنڈنگ نا برخلاف کارروائی آخبت ہم بے پرخ و تسلسل اتون برجاتخنگک تانکہ السی جاگہ غاتیا پنڈنگ نا منظم رجحان نا حوصلہ شکنی ءِ کننگ مرے و راج انا حقدار تپہ غاتے گچین راجی رکھ فراوان کننگ مرے۔