بلوچستان اٹی سیکورٹی فورس آتا کاروائی تیٹی 48 گھنٹہ ٹی 36دہشت گرد خلنگار،آئی ایس پی آر

راولپنڈی، کوئٹہ لاہور/ اسلام آباد، بلوچستان اٹی سیکورٹی فورس آتا فتنہ الہندوستان و فتنہ الخوارج نا برخلاف کارروائیک پدریسہ برجا ءُ، تدوک آ 24 گھنٹہ ٹی مستونگ، کوئٹہ، قلات و سبی ٹی کیہی انٹیلی جنس بیسڈ آپریشن کننگار۔ پاک فوج انا شعبہ تعلقاتِ عامہ (آئی ایس پی آر) نا رِداٹ جتا جتا کارروائی تا وخت آ فتنہ الہندوستان و فتنہ الخوارج نا 36 دہشت گرد دوزخی کننگار۔ آئی ایس پی آر نا رِداٹ 4 ستمبر آ مستونگ اٹی سیکورٹی فورس آتا کارروائی ٹی 6 بھارتی اسپانسرڈ دہشت گرد خلنگار۔ وخت اس کہ دہشت گرد آتیان دوئی مروک منچر و دھماکہ ئی مواد آتے جاگہ غا بھس کننگا۔ ترجمان پاک فوج انا رِداٹ کوئٹہ نا علاقہ شعبان اٹی فتنہ الخوارج نا 4 ہند ءِ شست کننگا۔ کارروائی ٹی 26 خوارج خلنگار۔ قلات اٹی ہم سیکورٹی فورس آک کارروائی کرسا 2 بھارتی اسپانسرڈ دہشت گرد ءِ خلکر۔ وخت اس کہ سبی نا علاقہ بھاگ اٹی سیکورٹی فورس آتا ورندی کارروائی ٹی پین 2 دہشت گرد خلنگار۔ آئی ایس پی آر نا رِداٹ تدوک آ 48 آن 72 گھنٹہ ٹی بلوچستان اٹی جتا جتا کارروائی ٹی جم وڑ اٹ 48 دہشت گرد خلنگانو۔ ترجمان نا رِداٹ برجا سال بلوچستان اٹی سیکورٹی فورس آتا آپریشن تے ٹی دا وخت اسکان 1188 آن زیات دہشت گرد خلنگانو۔ آئی ایس پی آر پارینے کہ ملک اٹی امن و دہشت گردی نا پورو چٹفنگ کن عزمِ استحکام نا رِداٹ کارروائیک آخریکو دہشت گرد نا چٹفنگ اسکان برجا سلرہ۔ وزیراعظم محمد شہباز شریف بلوچستان نا ضلع قلات اٹی فتنہ الہندوستان نا دہشت گرد آتا برخلاف سرسہب آپریشن آ سیکورٹی فورس آتا افسر و کارندہ غاتے خراجِ تحسین پیش کرینے، جمعہ نادے وزیرِ اعظم آفس نا میڈیا ونگ آن جاری بیان نا رداٹ وزیرِ اعظم ضلع قلات اٹی فتنہ الہندوستان نا 12 دہشت گرد خلنگ آ سیکورٹی فورس آتاکسبی لائخی و بہادری نا ستاءِ کرے۔ وزیرِ اعظم پارے کہ دہشت گردی نا سیخا نا ملک آن پورو چٹفنگ اسکان اونا برخلاف جنگ ءِ برجا تخنہ، سیکورٹی فورس آتا افسر و کارندہ غاک وطنِ عزیز نا امن ءِ نسخان رسیفوک دہشت گرد آتا برخلاف گچین کارروائی کننگ اٹی ءُ۔ وزیرِاعظم پارے کہ وطنِ عزیز نا رکھ انا بدل مفروک عزم اٹی کنتون اوار مچ آ قوم پاکستان نا فوج اتون اوار سلوک ءِ۔ دہشت گرد آتے بلوچستان نا امن ءِ بھس کننگ نا پراگندہ عزم آتیٹی سرسہب مننگ کن الیپنہ۔ داکان بیدس صدر مملکت آصف علی زرداری قلات اٹی انٹیلی جنس نا بنداو آکارروائی ٹی بھارتی پراکسی فتنہ الہندوستان نا 12 دہشت گرد خلنگ آ سیکورٹی فورس آتے خراج تحسین پیش کرینے، جمعہ نادے آایوانِ صدر نا پریس ونگ آن جاری بیان نا رداٹ صدر مملکت پارے کہ پیشن نا کاٹم خواجہی ٹی مروک دہشت گردی نا پورو چٹفنگ کن سیکورٹی فورس و کانود نافذ کروک ادارہ غاتا پدریسہ کارروائی ستاکڑزک۔ او پارے کہ دہشت گردی نا ناچوڑ ءِ امر کہ مرے کہ چٹفنگک۔ صدر مملکت پارے کہ مچ آ قوم دہشت گردی نا برخلاف جنگ اٹ تینا سیکورٹی فورس آتتون ہم کوپہ سلوک ءِ۔