مالدیپ نا صدر نا دورہ تعلقداری تے مونی دننگ نا سوب مریک،قومی اسمبلی نا اسپیکر

اسلام آباد، قومی اسمبلی نا سپیکر سردار ایاز صادق مالدیپ نا صدر ڈاکٹر محمد معیز تون اوڑدہی کرے و اونا پاکستان نا دورہ نا ستاءِ ءِ کرے۔ قومی اسمبلی نا سیکرٹریٹ نا رداٹ اوڑدہی ٹی ہڑتوم آ کنڈآتا پارلیمانی و اقتصادی تعلقداری تتون اوار اہم علاقائی و جہانی باندات آتیا گپ وتران کننگا۔ او پارے کہ پاکستان مالدیپ تون تینا متکن آ تعلقداری تے بھاز اہمیت ایتک۔ او پاکستان و مالدیپ نا نیام اٹ پارلیمانی و اقتصادی تعلقداری تے پین سوگو کننگ آ زور شاغا و پارے کہ پاک مالدیپ پارلیمانی فرینڈشپ گروپ ہڑتوم آ کنڈآتا پارلیمانی تعلقداری تا مونی دننگ اٹ فعال کڑد ادا کننگ ءِ۔۔ پارلیمانی سفارتکاری علاقائی ملک آتا نیام اٹ تعلقداری تا مونی دننگ اٹ اہم کردار ادا کننگ کیک۔ قومی اسمبلی نا اسپیکر پاکستان و مالدیپ نا نیام اٹ واپاری کچ ءِ ودفنگ کن مروک آ معاہدہ غاتا ستاءِ کرے۔ او پارے کہ مالدیپ نا صدر نا پاکستان نا دورہ ہڑتوم آ کنڈآتا تعلقداری تا مونی دننگ اٹ اہم پیشرفت پک مریک۔ مالدیپ نا صدر ڈاکٹر محمد معیز پاکستان تون تعلقداری تے پین مونی دننگ نا عزم انا درشانی ءِ کرسا پارے کہ مالدیپ نا الس پاکستانی الس تون خڑکی تخک۔ مالدیپ نا صدر علاقائی امن نا جوڑ کننگ کن پاکستان نا کڑد انا ستاءِ کرے و جم وجوش اٹ بخیر و مہمان نوازی آحکومت پاکستان و پاکستانی الس تون منتواری نا درشانی ءِ کرے۔ اوڑدہی ٹی قومی اسمبلی نا باسک شازیہ ثوبیہ، شائستہ خان و سنجے پروانی اسک ہم ساڑی ئسر۔