ریفیوزل یو سی تیٹی ٹیم تا کارکڑد نا جاچ ءِ ہلسا پوسکن ءُ ٹیم سلفنگے،کمشنر کوئٹہ ڈویژن

کوئٹہ، کمشنر کوئٹہ ڈویژن ذیشان لاشاری نا کماشی ٹی کوئٹہ ڈویژن اٹی پولیو نا جم حالیت و بروک آ پولیو مہم نا بست وبند تون تعلقدار ڈویژنل ٹاسک فورس آن لائن دیوان اڈ ہلک، ہراٹی پولیو مہم نا کارکڑد، مسڈ چلڈرن، ریفیوزلز، نو ڈوز چناتا کوریج، سیکورٹی، مانیٹرنگ و ویکسینیشن نا نظام نا جم جاچ ءِ ہلنگا۔ دیوان اٹی ڈویژنل کوآرڈینیٹر ٹاسک فورس ڈاکٹر صفدر، اے سی او ڈاکٹر عزیز احمد، اے سی او محمد سہیل احمد، ڈویژنل آفیسر ڈاکٹر امداد علی آن بیدس ڈبلیو ایچ او و ایلو ادارہ غاتا افسرآک ساڑی ئسر وخت اس کہ ڈپٹی کمشنر کوئٹہ مہراللہ بادینی، ڈپٹی کمشنر کوئٹہ ویسٹ منیر احمد درانی، ڈپٹی کمشنر مستونگ بہرام خان آن بیدس صوبائی کوآرڈینیٹر ای پی آئی بلوچستان ڈاکٹر آفتاب کاکڑ، ڈی ایچ اوز، ڈپٹی ڈی ایچ اوز، یونیسیف، نیشنل پروگرام، ڈبلیو ایچ او و ایلو ادارہ غاتا افسرآک آن لائن دیوان اٹی بشخ ہلکر۔ دیوان اٹی پارت کننگا کہ مسڈ چلڈرن، ریفیوزلز و نو ڈوز چناتیا خصوصی چکار کننگے و بروک آ پولیو مہم آن مست ٹیم تا ہیلکاری نا عمل ءِ زوت پورو کننگے۔ کمشنر پارے کہ ہرا یونین کونسل آتیٹی ریفیوزلز نا کچ زیات ءِ، ہموڑے ٹیم تا کارکڑد نا جاچ ءِ ہلسا گرج انا رِد اٹ پوسکن ٹیم تعینات کننگے۔ مستونگ اٹی نو ڈوز چناتا زیات کچ انا سوب آن مہم نا ڈٹ بندی نا اولسر جاچ ہلنگ و کوریج ءِ گچین کننگ نا پارت ہم کننگا۔ دیوان اٹی پاننگا کہ زیرو ڈوز چناتا کچ 10 ہزار آن کم مرسا 8 ہزار 708 مسنے‘ ولے دا رد اٹ پین گام گیج کننگ نا گرج ءِ۔ وار وار سلوک آ چناتا باقاعدہ ریکارڈ جوڑ کننگ، مدامگی مسڈ چناتا نشاندہی و اوفتسکان رسینگ گیگ ءِ پک کننگ آ زور شاغنگا۔ دیوان اٹی دا ہم پاننگا کہ ہرا یونین کونسل آتیٹی سیکورٹی یا رسینگ گیگ نا ویل آتا سوب آن مانیٹرنگ مفننگ اٹی ءِ، ہموڑے تعلقدار کمامدار آک ویل آتے ایسر کننگ کن بھرمی گام گیج کیر۔ کمشنر ذیشان لاشاری پارت کرے کہ کم کارکڑد نشان تروک یونین کونسل آتا جتا جتا جانچ پڑتال کننگے و تعلقدار افسر آتیان کارکڑد نا بابت پیدوار خواست کننگے۔ او پولیو مہم اٹ ٹیم تا ہیلکاری، چاروکی و فیلڈ اٹی عملی کارکڑد ءِ گچین کننگ نا گرج آ زور شاغا۔ دیوان اٹی صوبائی کوآرڈینیٹر بلوچستان ڈاکٹر آفتاب کاکڑ ای پی آئی پروگرام نا تدوک آ اِرا تُو انا کارکڑد آ بریفنگ ترسا پارے کہ کوئٹہ ٹی ویکسینیشن کوریج نا منہ ٹک آتے ٹی گچینی بسنے، ولے مستونگ تون اوار جتا جتا علاقہ غاتیٹی پین گام گیج کننگ ناگرج ءِ۔ او پارے کہ رکھی ٹِکہ غاتا کوریج، ڈیٹا انٹری، ڈراپ آؤٹ و زیرو ڈوز چناتا کچ اٹ گچینی اتنگ المی ءِ۔ ڈاکٹر آفتاب کاکڑ کوئٹہ ٹی سورک نا کیس تا رد اٹ رکھی ٹِکہ غاتا کوریج ءِ ودفنگ، وخت آ ڈیٹا انٹری و فیلڈ ریکارڈ نا درستی ءِ پک کننگ آ زور شاغا۔