ٹیلی میڈیسن سروس نا بنا بلوچستان اٹ گچین آسراتی کن اہم ءُ پیشرفت اسے،وزیر اعلیٰ میر سرفراز بگٹی

کوئٹہ، بلوچستان اٹی جان جوڑی نا آسراتی تے پوسکن ٹیکنالوجی نا کمک اٹ الس نا درگہ اسکان سرکننگ کن ٹیلی میڈیسن ہیلتھ یونٹس کاریم نابناءِ کرینے ہراڑتون ڈیجیٹل نظام نا کمک اٹ شاری تے طبی سلاہ ومشورہ و کمکاری نا فراوانی باقاعدہ بنا کرینے۔ وزیراعلیٰ بلوچستان میر سرفراز بگٹی ٹیلی میڈیسن سروس نا کارکڑد نا جاچ ءِ ہلنگ کن بنجائی ڈیسک آ تعینات طبی چاہندارآتتون اناگت حوال کرے سروس نا وڑوڈول، شاری تے تروک طبی آسراتی و السی رسینگ نا بارواٹ سرجمی اٹ اَرفے۔ وزیر اعلیٰ میر سرفراز بگٹی طبی چاہندار آتتون گپ وتران کرسا ٹیلی میڈیسن سروس نا کمک اٹ شاری تے طبی سلاہ ومشورہ فراوان کننگ نا عمل نا جاچ ءِ ہلک و بنجائی ڈیسک آ تعینات کارندہ غاتا مستعدی و خذمت آتیا است جمی نا درشانی ءِ کرے۔ او پارے کہ الحمدللہ، الس تون کروک آ اسہ پین قول اس پورو کرینن۔ ٹیلی میڈیسن سروس نا بنا بلوچستان نا الس ءِ گچین آسراتی فراوان کننگ و پوسکن ٹیکنالوجی آ ن فائدہ ہرفنگ نا کنڈآ اسہ اہم ءُ پیشرفت اسے۔ وزیر اعلیٰ پارے کہ مر انگا علاقہ غاتیٹی رہینگوک آ شاری تے چنکا طبی سلاہ و مشورہ کن ہم بھلو سفر اس کروئی تمک، ہرانا سوب آن اوفتے وخت، خڑچ و ایلو مشکل آتتون مون تروئی تمک۔ ٹیلی میڈیسن سروس نا کمک اٹ دا ویل آتیٹی کمتی اتنگ و شاری تے ڈیجیٹل نظام نا رداٹ طبی چاہندار آتتون سلاہ ومشورہ نا آسراتی فراوان کننگ اٹ کمک رسینگک۔ میر سرفراز بگٹی پارے کہ حکومت بلوچستان جان جوڑی تون اوار بنداوی آسراتی تا فراوانی ٹی مرانگا علاقہ غاتا الس نا مشکل آتے کم کننگ کن عملی گام گیج کننگ اٹی ءِ۔ پوسکن آ ٹیکنالوجی آن فائدہ ہرفسا طبی سلاہ ومشورہ ءِ الس کن زیات رسینگ نا قابل جوڑ کنگ وخت نا اہم گرج ءِ، تانکہ جغرافیائی فاصلہ آب اٹ طبی راہشونی نا دوئی کننگ اٹ اڑاند جوڑ مف۔ بلوچستان نا وزیراعلیٰ دا ارادگی نا درشانی ءِ کرے کہ الس ءِ گچین آسراتی تا فراوانی و جان جوڑی نانظام اٹی گچینی کن گام گیج آتے برجاتخنگک۔ او پارے کہ حکومت نا کوشست ءِ کہ بلوچستان نا مر انگا علاقہ غاتیٹی رہینگوک شاری تے ہم پوسکن آسراتی دُو بریک و اوفتے درمان نا بابت راہشونی نا دوئی کننگ کن بے گرج مشکل آتتون مون تروئی تمپ۔