بیوس مسن، خیبرپختونخوا ٹی ایمرجنسی و گورنر راج اسُل نا استی ٹی نافذ کننگا،وزیراعظم محمد شہبازشریف

پشاور، وزیراعظم محمد شہباز شریف پارینے کہ خیبرپختونخوا غیرتی و بہادر آ بندغ آتا زیبدار ءُ صوبہ اسے، نن مرسا صوبہ ٹی ایمرجنسی و گورنر راج نافذ کرین‘ 2018ء اسکان دا صوبہ ٹی پورو امن مسوسس، امن نا برجائی آن پد پی ٹی آئی نا دور اٹی دہشتگرد آتے دوارہ بٹنگ انگا، کل قربانی تیا دیر شاغنگا‘ ہرانا خواری تے صوبہ نا الس ءِ ہرفوئی تما۔ کل صوبہ غاک دہشت گردی تور اکن خیبرپختونخوا ءِ وسیلہ فراوان کننگ آ امنا کریر، 2010ء آن پد خیبرپختونخوا ءِ این ایف سی ایوارڈ نا رد اٹ دہشت گردی توراکن 800 ارب روپئی تننگا۔ ارمان نا ہیت اسے کہ دہشت گردی چٹنگ نا جاگہ غا پین زیات مون آ بس، خیبرپختونخوا نا الس محرومی تا گواچی ءُ، ای قول کیوہ کہ بنجائی حکومت، عسکری سرکڑدہ غاتا اواری اٹ خیبرپختونخوا نا الس نا ویل آتے ایسر کیک‘ خیبرپختونخوا ٹی خوشی، امن و شونداری نا دور ءِ دوارہ پدی اتینہ‘ پنچ شنبے نا دے پشاور اٹی وزیراعظم محمد شہباز شریف نا کماشی ٹی خیبرپختونخوا نا اپیکس کمیٹی نا دیوان اڈ ہلک۔ دیوان آن تران کرسا وزیراعظم شہباز شریف پارے کہ خیبرپختونخوا ٹی کرپشن نا پوسکن آ کسہ غاک مون آ بسر، خیبرپختونخوا ٹی کنوئی آ سفا انگا دیر انا ڈٹ اٹی 100 ارب روپئی نا کرپشن مس، کوہستان میگا سکینڈل اٹی 37 ارب نا کرپشن مون آ بس، پلیسر گولڈ پروجیکٹ اٹی تینا بندغ آتے ٹھیکہ تننگا۔ او پارے کہ خیبرپختونخوا غیرتی و بہادر آ بندغ آتا زیبدار ءُ صوبہ اسے، ننے مجبوری ٹی صوبہ ٹی ایمرجنسی و گورنر راج نافذ کروئی تما۔ خدا غان دعا ءِ کہ صوبہ ٹی امن و شونداری نا عمل ءِ مونی دننگ اٹی کمک کے۔ وزیراعظم پارے کہ پشاور اٹی اسکول نا چھت تمنگ آن اسہ استاد اس و چناتا ارمانی کزیت آ بھاز ارمانی اُٹ، گورنر صاحب ءِ پاریسٹ کہ او زہمی ہند انا دمدستی دورہ ءِ کرسا دا سانحہ نا پورو جاست پاست ءِ کرفے۔ منہ سال اٹی ہرا حالیت آک ودی کننگار اوفتا سوب آن دا صوبہ بھاز زہمی مسنے۔ شش سال اٹی ہرا حالیت آک ودی کننگار اونا پد اٹی امن وایمنی ءِ بھلو نسخان اس رسینگا، ننا بہادر آ فوج و سیکورٹی ادارہ غاک بھلو قربانی ترسا خیبرپختونخوا تون اوار پاکستان اٹی دہشت گردی ءِ چٹفیسر 2018ء اسکان دا صوبہ ٹی پورو امن ئس‘ شہباز شریف پارے کہ دا امن سیکورٹی ادارہ غاتتون اوار ننا لمہ، ایڑھ و چناتا قربانی تا رند اٹی پک مسوسس۔ دہشت گردی نا برخلاف جنگ اٹی 80 ہزار بندغ شہید مسر و ارب آ ڈالر نا نسخان مس، خیبرپختونخوا نا کیہی سیاسی خاہوت آک دہشت گردی نا برخلاف بھلو قربانی تسر، کیہی اُراک بھس مسر، عظیم آ قربانی تا رند ا ٹی پورو امن بسوسس، امن آن پد پی ٹی آئی نا دور اٹی دہشتگرد آتے دوارہ بٹنگ انگا، کل قربانی تیا دیر شاغنگا۔ ہرانا خواریک صوبہ نا الس ءِ ہرفوئی تمار، قوم انا چناتا آخبت کن ننا سیکورٹی فورس آتا ہزار آ ورناک تینا جان تے ندر کریر، دا قربانی تا احساس و شرف ءِ کپننگ آن بھلو ملکی دشمنی پین انت مننگ کیک۔