قومی اسمبلی ٹی عئید میلاد النبیﷺ نا بابت قرارداد امنائی اٹ منظور

قومی اسمبلی عئید میلاد النبیﷺ ءِ گچین وڑ اٹ اڈ تننگ و نبی اکرم ﷺ نا سنت و سیرت نا مونی دننگ نا عزم انا قرارداد ءِ امنائی وڑ اٹ منظور کرے۔ سے شنبے نا دے آقومی اسمبلی نا دیوان اٹ ہڑدے نا کارروائی ءِ معطل کرسا دا قرارداد ءِ بنجائی وزیر پارلیمانی باندات ڈاکٹر طارق فضل چوہدری پیش کرے ہرانا ایوان امنائی وڑ اٹ منظوری ءِ تس۔ قرارداد اٹ پاننگانے کہ دا ایوان 1500 می میلاد النبی ﷺ نا تاریخی اہمیت نا رداٹ دا قرارداد ءِ پیش کیک کہ بنجائی و صوبائی حکومت آک دا وخت ءِ بڑزکو کہول آ، قومی پروگرام، میلاد النبیﷺ نا محفل، میڈیا مہم، آسودہی گام گیج، سرکاری و نیم سرکاری ماڑی و شاہراہ تے بیرفنگ نا کمک اٹ اڈ ایتر۔ قرارداد اٹ پاننگانے کہ کل سرکاری و پرائیویٹ ادارہ تعلیمی و کاروباری ادارہ، میڈیا ہاؤس آک پبی بشخ ہلسا خواجہ محمد ﷺ نا تعلیمات آتا رداٹ امن، رواداری و اخوت ءِ مونی دیر۔ قرارداد اٹ پاننگانے کہ دا ایوان خواجہ محمد ﷺ نا سنت و سیرت نا مون آ دننگ نا عزم کیک و مچ آ قوم آن خواست کیک کہ او دا برکتی آ وخت ءِ بھاز عقیدت، شرف و سیوت اٹ اڈ ایتر۔