رسول اکرم ؐ نا ولادتِ باسعادت عالمِ انسانیت کن روشنا دور اسے نا بنا ئسکہ،صدر مملکت / وزیر اعظم

صدر مملکت آصف علی زرداری 12 ربیع الاول 1448ھ نا برکتی آ وخت آ مچ آ قوم و مچ آ عالمِ اسلام ءِ نبی آخر الزماں حضرت محمد مصطفیٰ ﷺ نا ولادتِ باسعادت نا است انا ہُب اٹ مبارکبادی تسنے۔ تینا کلہو اٹی صدر مملکت پارے کہ دا دے اللہ تعالیٰ نا ہمو عظیم انگا نعمت نا یات ءِ پوسکن کیک ہرانا کمک اٹ انسانیت ءِ ایمان، ہدایت، عدل، رحمت و اخلاقِ حسنہ نا پورو و پورو انگا کسر عطا مس۔ آصف علی زرداری پارے کہ اللہ تعالیٰ حضرت محمد مصطفیٰ ﷺ ءِ ہڑتوم آ جہان تیکن رحمت جوڑ کرسا مبعوث فرمائفے۔ رسول اکرم ﷺ نا ولادتِ باسعادت عالمِ انسانیت کن اسہ ہندن ءُ روشنا ءُ دور اسے نا بنا ئس ہراڑے جہالت نا تہاری چٹّا و علم و ہدایت نا روشنائی نصیب مس، بیدادیک توننگار و عدل و انصاف نا لازوال ءُ درور اس جوڑ مس۔ صدر مملکت پارے کہ نبی کریم ﷺ تینا اسوہ حسنہ نا کمک اٹ قرآنِ مجید آ عمل کرسا انفرادی و اجتماعی آسودہی و نجات نا اسہ ہندن ءُ انقلاب اس ایس ہرانا ہچ ءُ درور اس ملپک۔ حضور ﷺ پک کرے کہ اسہ جوان ءُ راج بڑزکو فطری قدر، عدل, رحم, احساسِ زمواری‘ تقویٰ و پرہیزگاری نا کمک اٹ جوڑ مریک۔ او پارے کہ سیرتِ طیبہ ننے انسان تا نیام اٹی تین پہ تینی شرف و جوانی نا جوزہ نا شون تننگ نا سبخ ایتک۔ نبی کریم ﷺ نزور‘ محروم، چوری‘ مسکین و ضرورت مند بندغ آتا حق آتا رکھ ءِ کرے و حسنِ سلوک و ایلمی نا تعلیم تس۔ صدر آصف علی زرداری پارے کہ 12 ربیع الاول نا خواست دادے کہ نن عشقِ رسول ﷺ نا درشانی ءِ حضور ﷺ نا سیرت و سنت ءِ تینا انفرادی و اجتماعی زند اٹ تینائی کرسا کین۔ وزیراعظم محمد شہباز شریف 12 ربیع الاول 1448ھ نا بابرکتی وخت آ پاکستان و مچ آ دنیا ٹی آباد امتِ مسلمہ ءِ سید الانبیاء، خاتم النبیین حضرت محمد مصطفیٰ ﷺ نا ولادتِ باسعادت آ است انا ہُب اٹ مبارکبادی و عقیدت پیش کرینے۔ تینا کلہو اٹی وزیراعظم پارے کہ حضور اکرم ﷺ نا ذاتِ مطہرہ ایمان، علم، اخلاق و عدل آ تالان پورو و بے مٹ ضابطہ حیات نا پیغامِ الٰہی مچ آ عالمِ انسانیت اسکان رسیفے۔ وزیراعظم شہباز شریف پارے کہ دا سال قومی کہول آ 12 ربیع الاول ”نسلِ نو کا تحفظ، تعبیر اور کردار، سیرت النبی ﷺ کی روشنی میں“ نا سرحال آ اڈ تننگ انگ ءِ‘ ورنا چین نا گچین کڑدارسازی کن راستکی‘ دیانت، خواری‘ نظم و ضبط، کانود آ عملدرآمد و و احساسِ زمواری کون آ اسلامی شعار آتے اوفتا ہیلکاری نا بشخ جوڑ کروئی تمک۔ او پارے کہ ورنا چین سیرتِ رسول ﷺ نا روشنائی آن منور مرسا علم و پٹ وپول‘ خواری و خذمت نا جوزہ غان سرشار مرے و ملک و قوم انا شونداری ٹی تینا کڑد ءِ ادا کے۔ وزیراعظم پارے کہ رسول اللہ ﷺ نا بعثت راجی چاگڑد ءِ اسلامی تعلیمات نا روشنائی ٹی اسہ پوسکن ءُ کسر اس تس۔ حضور اکرم ﷺ مکہ مکرمہ ٹی توحید، تقویٰ و اخلاقی پاکیزگی کون آ قدر آتا کمک اٹ اصلاح نا بنداو ءِ تخا، وخت اس کہ مدینہ منورہ ٹی عدل و مساوات، کانود نا بالادستی و انسانی حق و زمواری آتالان اسلامی راج اس جوڑ کرے. شہباز شریف پارے کہ اسوہ حسنہ کل مسلمان تا دینی و دنیاوی اصلاح، آسودہی و دروری سرسہبی کن کسر نا ڈیوا ءِ۔ سیرتِ النبی ﷺ ہر دور انا بدل مروک گرج آتیان پد ہم بنی نوع انسان کن پورو راہشونی نا بُن چکل ءِ۔