وزیراعظم و فیلڈ مارشل نا کوشست آتیٹی زرگزران شون ہلنگ اٹی ءِ،سردار ایاز صادق

اسپیکر قومی اسمبلی سردار ایاز صادق پارینے کہ سسٹم بے سہب متنے بلکن بھرم مونی اتنگ اٹی ءِ‘ و وزیراعظم و فیلڈ مارشل نا کوشست آتیٹی ملک انا زرگزرانی حالیت پدریسہ گچینی نا کنڈ آ ہننگ اٹی ءِ۔ نظام نا بابت پک فیصلہ ءِ الس نا جند کیک، برانز و چک چکنگ و جھیڑہ غاک ویل آتا ایسری نا کسر آخا بلکن مذاکرات مونی ہننگ نا کِسر ءِ۔دا وخت آ میڈیا تون گپ وتران کرسا اسپیکر قومی اسمبلی پارے کہ پاکستان نا زرگزرانی حالیت مستین اٹی بھاز خراب مسوسس ولے داسہ گچینینا کسر آ گام ہرفنگ اٹی ءِ۔ او پارے کہ پاکستان بھارت نا برخلاف جنگ اٹی سرسہبی دوئی کرے و اوکان پد ایران و امریکہ نا نیام اٹی خیرخواہی نا کڑد ادا کرسا جہانی کہول آ تینا شرف ءِ پین ودفے۔ مچ آ دنیا پاکستان نا گچین و تعمیری کڑد ءِ امنا کیک۔ ایاز صادق پارے کہ بطور کسٹوڈین آف دی ہاؤس کنا زمواری ءِ کہ پارلیمان اٹی خواری و کاریم کروک آتا جہد و کوشست آک زیان مفس۔ او پارے کہ اگہ سوج ورندی نا وخت آ تعلقدار وزیرک وسیکرٹریک ایوان اٹی ساڑی مفس تو سخت کارروائی کروئی تمک‘ تانکہ پارلیمانی نظام بھرمی وڑ اٹ چلینگے۔او پارے کہ پی ٹی آئی نا باسک آک اوڑتون حوال اٹ مریرہ۔ اسہ سوجی نشان اسے نا ورندی ٹی او مسخرہ کرسا پارے کہ او ایوان اٹی پترینگ تون آیت الکرسی، درود شریف و چارو قل خوانک، ہراڑان چاگڑد جوانی نا کنڈ آ کاہک و چاگڑد جوان مریک۔ اسپیکر قومی اسمبلی پارے کہ او مستین ہم پاکستان پیپلز پارٹی و حکومت نا نیام اٹی خیرخواہی نا کڑد ادا کرینے‘ و داسہ بھی ہڑتوم آ جماعت آتا نیام اٹی رابطہ غاتیٹی کڑد ادا کننگ اٹی ءِ۔ او پارے کہ ہڑتوم آ جماعت تا نیام اٹی منہ باندات اریر‘ ولے اومیت ارے کہ ہیت و گپ نا کمک اٹ ایسر مریرہ۔ پی ٹی آئی نا پارلیمانی کمیٹی تیٹی بشخ ہلپننگ آ ارمان کرسا ایاز صادق پارے کہ اپوزیشن ءِ کمیٹی تیٹی پدی بروئی تمک۔ ایہن تو اوفتا بشخ ہلپننگ آ کمیٹی تا کاریمک سلتنو ولے بشخ ہلسا او حکومت آن پین جوانی اٹ پرسجو کننگ کیرہ و اصلاحات کن بھرمی سلاہ تننگ کیرہ۔