حوثی تاسعودی عرب نا شار ینبع غا جلہو نا دعویٰ

ریاض، یمن نا حوثی گروپ دعویٰ کرینے کہ او سعودی عرب نا کرکی شار ینبع نا خڑک آ اسہ بحری جہاز اسے میزائل جلہو اٹ شست کرینے۔ دوشنبے نا دے حوثی گروپ نا عسکری ترجمان یحییٰ سریع ٹیلی گرام آ اسہ بیان اس ترسا دا جلہو نا زمواری ءِ امنا کرینے۔ سعودی عرب نا سرکاری شپنگ کمپنی بحیرہ احمر اٹی جہاز آ جلہو ءِ پک کرسا پارے کہ جہاز آ ساڑی کل کارندہ غاک رکھوک ءُ‘ حوثی گروپ نا بیان اٹی پاننگانے کہ یمنی سلہہ بند فوج فورس آک قطبی بحیرہ احمر اٹی ینبع نا کرک انا خڑک آ سعودی تیل بردار جہاز ‘امزان’ ءِ بیلسٹک میزائل اٹ سرسہبی اٹ شست کریر۔ ہرانا سوب آن جہاز اٹی خاخر لگا و ایلو جہاز آک ہمو جاگہ غان نرار۔ حوثی عسکری ترجمان یحییٰ سریع تینا بیان اٹی پین اِرا کارروائی تا بابت پارے کہ العبَر و الودیعہ نا علاقہ غاتیٹی سعودی فورس آتا اسہ بھلو عسکری قافلہ اسے بیلسٹک میزائل و ڈرون اٹ شست کننگا۔ وخت اس کہ الکنائس نا علاقہ ٹی سعودی فورس آتیا بیلسٹک میزائل اٹ جلہو کننگا۔