شامی وزیر خارجہ نا تاریخی دورہ،پاکستان و شام انا تین پہ تینی تعقلداری تیٹی پوسکن ءُ کسر اسے نا بنا
علاقائی اورجہانی ملک آک پاکستان تون سیاسی، زرگزرانی و سیکورٹی کمکاری ءِ ودفنگ اٹ استخواہی نشان تننگ اٹی ءُ‘ رپورٹ
Get real time updates directly on you device, subscribe now.
اسلام آباد، شام انا وزیرِ خارجہ نا پاکستان نا تاریخی دورہ ءِ ہڑتوم آ کنڈ انا تعلقداری ٹی پوسکن ءُ دور اسے نا بنا گوندسا شامی میڈیا بھاز ستا ءِ کرینے و پارے کہ علاقائی و جہانی ملک آک پاکستان تون سیاسی، زرگزرانی و سیکورٹی کمکاری ءِ ودفنگ اٹ بھاز است خواہی نشان تننگ اٹی ءُ۔ شامی سلاہکار محمد الجفال پارے کہ دا دورہ اسہ اہم و حساس ءُ وخت اسے آ مسنے ہراتم ہڑتوم آ ملک آتا تعلقداری پین کمکاری نا کنڈ آ ہننگ اٹی ءِ۔ شامی حوالکار ادارہ سریا عرب نیوز ایجنسی نا رِد اٹی شام انا وزیرِ خارجہ اسعد حسن الشیبانی نا 19 سال آن پد پاکستان نا اہم و اولیکو دورہ پورو مس۔ دورہ نا وخت آ دمشق و اسلام آباد نا نیام اٹی سیاسی، سیکورٹی و زرگزرانی کمکاری ءِ پین سوگو کننگ آ جم سجفنگا۔ سریا عرب نیوز ایجنسی نا رِد اٹ شامی وزیرِ خارجہ تدوک آ دے چارشنبے نا دے اسہ بڑزکو کہولی ڈل اتون اوار اسلام آباد آسر مس، ہرادے ہڑتوم آ کنڈ انا اسٹریٹجک کمکاری نا پوسکن آ ریسہ نا بنا گوندنگا۔ پاکستان نا کنڈ آن شام انا وتواجہی‘ علاقائی سالمیت و مقبوضہ گولان نا باندات آ شام انا موقف نا پبی مخ تفی نا دوارگی کننگا، پاکستان ادلب نا ابو الظہور ہوائی اڈہ غا اسرائیلی جلہو آتے جہانی کانود آن چَپ گوندسا اونا سخت مذمت ءِ کرے۔سریا عرب نیوز ایجنسی نا رِد اٹ وزیرِ خارجہ اسعد حسن الشیبانی وزیراعظم شہباز شریف، نائب وزیراعظم اسحاق ڈار، فیلڈ مارشل سید عاصم منیر و ایلو بڑزکو کمامدار آتتون اہم اوڑدہی کرے، الشیبانی “مکہ مشترکہ دفاعی معاہدہ” غا دستخط نا جوان ستاءِ کرے و پاکستان نا علاقائی کڑد انا ستا کرے، پاکستان و شام انا نیام اٹی السی و واپاری رابطہ غاتے مستی ودفنگ کن دراست بالی سروس نا بحالی آ جم گپ وتران کننگا۔سریا عرب نیوز ایجنسی نا رِد اٹ دمشق یا اسلام آباد اٹی زرکاری فورم نا اڈ تننگ و امریکہ ایران چک و تاڑ ءِ کم کننگ اٹی پاکستان نا کڑد آ ہیت مس۔ شامی سلاہکار محمد الجفال نیوز ایجنسی تون گپ وتران اٹی پارے کہ دا دورہ اسہ اہم و حساس ءُ وخت اسے آ مسنے ہراتم ہڑتوم آ ملک آتا تعلقداری پین کمکاری نا کنڈ آ ودنگ اٹی ءِ۔ دمشق ریاض، انقرہ و اسلام آباد تون تعلقداری تے علاقائی سوگوی کن خاص اہمیت والا گوندانے۔ پاکستان نا کنڈ آن شام انا وتواجہی‘ علاقائی سالمیت نا مخ تفی ہڑتوم آ ملک آتا سنگتی تعلقداری تے پین سوگو کیک۔