شاری مخلوق نا زوال نا کچ اٹ ودکی، روس یوکرین جنگ اٹی جلہو آتیان پد ترندی، 13 بندغ زوال

کیف، روس و یوکرین نا نیام اٹی برجا چک وتاڑ نا داسہ نا جلہو آتیٹی اسہ وار ولدا ترندی بسنے، ہراٹی چندی غاتیٹی مروک جلہو آتیٹی کم و ود 13 بندغ زوال مسر۔ دا حالیت آتے مون آ تخسا فرانس یوکرین ءِ پین فضائی رکھی میزائل فراوان کننگ نا پڑو کرینے۔ حوالی نا رِد اٹ داسہ نا جلہو آتیٹی یوکرین اٹی 7 وخت اس کہ روس اٹی 4 بندغ زوال مسر۔ روس انا کوزہ کروک کریمیا اٹی ہم 2 بندغ نا زوال مننگ نا حوال رسینگانے‘ دا پوسکن آ زوال تا رند اٹی جنگ اٹ شاری تا زوال تا کچ داسہ نا بڑزکو کہول آسر مسنے۔ یوکرین نا شار کریوی ریہ ٹی کمکی کارندہ غاک شاپنگ سینٹر نا ماڑی نا ڈیمبری ٹی پٹ و پول نا کاریم ءِ برجا تخانو۔ اسہ دے مست روسی ڈرون جلہو اٹی دا ہند ءِ نسخان رسینگا ہرانا سوب آن 16 بندغ زوال مسوسر۔ ایلو کنڈ آ فرانس نا صدر ایمانوئل میکرون یوکرین ءِ پوسکن آ میزائل انٹرسیپٹرز فراوان کننگ نا پڑو کرے۔ میکرون نا رِد اٹ یوکرین ءِ تینا فضائی دنگ انا دفاع و روسی جلہو آتے توننگ کن المی وسیلہ غاتے فراوان کننگ بھاز اہم ءِ۔ روس دا منہ تُو اٹ خاص وڑ اٹ یوکرین نا بنجائی شار کیف آ بیلسٹک میزائل جلہو آتیٹی ودکی کرینے۔ حوالی نا رِد اٹی بھاز ترند ہنوک میزائل منہ منٹ اٹی تینا نشانہ غا سر مریک، ہرا نا سوب آن شاری تا دمدستی رکھی ہند اسکان سر مننگ مشکل مریک۔ ہندن روس و یوکرین نا نیام اٹی جنگ ءِ توننگ کن سفارتی جہد آک ہم برجاءُ۔ امریکہ نا کنڈ آن ہڑتوم آ ملک آتا نیام اٹی دراست مذاکرات نا کیہی دور اڈ تننگار، ولے داسکان ہچ ءُ مدامگی پیش رفت اس متنے۔ فرانس و برطانیہ نا کماشی ٹی سیوتی ملک آک دوشنبے نا دے دیوان کیرہ، ہراٹی روس آ جنگ ءِ توننگ کن زورشاغنگ اٹی ودکی و یوکرین نا رکھی واکداری ءِ پین سوگو کننگ نا گام گیج تیا سجفنگک۔ ایلو کنڈ آ روسی کمامدار آتا رِد اٹ یوکرین نا اسہ ڈرون جلہو اٹی سویلی روس انا علاقہ ییسک اٹی اسہ اُرا ءِ شست کننگا، ہرانا سوب آن اِرا کودک ءُ چنا زوال و اوفتا لمہ باوہ ٹھپی مسر۔ دا وڑ جنگ انا ہڑتوم آ کنڈ آن شاریک اسہ وار ولدا جلہوآتا گواچی مسر۔