چین نا کمک آن بیدس امریکہ ایران ءِ زرگزرانی وڑ تنیا کننگ کپک،نیویارک ٹائمز

واشنگٹن، امریکی اخبار نیویارک ٹائمز تینا تجزیہ ٹی پارینے کہ ایران ءِ زرگزرانی وڑ اٹ تنیا کننگ نا امریکی کوشست آک چین نا کمک آن بیدس سرسہب مننگ کپسہ۔ نیویارک ٹائمز نا حوالی نا رِد اٹ چین ایران نا کل آن بھلا واپاری شریدار و ایرانی تیل انا اہم خریدار ءِ‘ ہرا سوب آن واشنگٹن کن بیجنگ ءِ گوجالنگ آسان اف۔حوالی نا رِد اٹ چین 2025 اٹی ایران تون کساس 41.2 ارب ڈالر نا واپار کرے، وخت اس کہ ہمو سال چین ایران آن کساس 31.2 ارب ڈالر نا خام تیل درآمد کرے، چینی خریدار آک ایران نا جم تیل برآمد نا کیہی وار کساس 90 درسد کچ ہرفرہ۔ نیویارک ٹائمز نا رِد اٹ ایران نا تیل انا بھلا خریدار چین نا چنکا پرائیویٹ ریفائنریک ءُ، ہرافتے لس وڑ اٹ ‘ٹی پاٹس’ پارہ، دا کمپنیک جہانی مالیاتی نظام تون کچ اٹ گنڈوک مننگ سوب آن روایتی امریکی رکھ آن بھلو حد اسکان آجو مننگ کیرہ۔ حوال اٹی پاننگانے کہ امریکہ ایران نا بینک، کمپنی، تیل انا واپاری و بحری جہاز آتیا رکھ خلنگ کیک، ولے اگہ چین ایرانی تیل ءِ بہا اٹ ہلیک و تہران تون واپاری تعلقداری ءِ برجا تخک تو ایران نا دو ٹی زر انا اسہ بھلو کسر اس ساڑی مریک۔ ایلو کنڈ آ چین اتون ہم امریکہ غا زرگزرانی زور شاغنگ نا وسیلہ غاک اریر‘ بیجنگ امریکہ کن گرج انا اہم انگا معدنیات نا برآمد ءِ کچ اٹی کرسا امریکی ٹیکنالوجی و دفاعی صنعت ءِ زہمی کننگ کیک، چین تدوک آ سال امریکہ تون واپاری چک و تاڑ نا وخت آ اہم معدنیات نا برآمد آ رکھ خلسا تینا زرگزرانی واک انا پیدوار ءُ درشانی اس کریسس۔ تجزیہ نا رِد اٹ ہندا حالیت واشنگٹن کن اسہ ویل اس ودی کیک، امریکہ ایران آ پین رکھ خلنگ کیک، ولے چین نا کمکاری آن بیدس ایران ءِ پورو وڑ اٹ زرگزرانی وڑ اٹ تنیا کننگ بھاز مشکل ءِ۔ حوال اٹی دا ہیت آ ہم پام کننگانے کہ نیامی دے ٹک اٹی امریکی فوجی سرج آتا سوب آن امریکہ بحرالکاہل آن چندی فوجی مڈی تے گدریفینے‘ چینی مبصر آک دا گام گیج آتے ایشیاء ٹی امریکی فوجی پوزیشن کن کاختی تکرہ۔ نیویارک ٹائمز نا تجزیہ ٹی پاننگانے کہ ایران آ زرگزرانی زور ءِ ودفنگ نا امریکی سُج پام نا سیبو بھلو کچ اسے ٹی دا ہیت آ ارے کہ چین واشنگٹن تون کمک کیک یا تہران تون تینا واپاری تعلقداری ءِ برجا تخک۔