عمران خان اسُل دراخ جوڑ ءِ، دا بابت ہچ سیاست کننگپ،وزیر دفاع خواجہ آصف

وزیر دفاع خواجہ محمد آصف پارینے کہ عمران خان نا جان جوڑی ءِ ہچ ءُ خطرہ اس اف، او دراخ جوڑ ءِ، اونا جان جوڑی آ سیاست کننگپ، تینا دور اٹ عمران خان شریف برادر تون اوار کل انا ناجوڑی تیا جلسہ غاتے ٹی ملنڈ کریکہ ہرافتا ویڈیوتے دا ایوان نا اسکرین تیا نشان تننگ مریک۔ جمعہ نادے قومی اسمبلی ٹی گوہر علی خان نا اعتراضی ٹک انا ورندی ٹی او پارے کہ عمران نا ایڑھ ہرا ڈاکٹر ہم ارے اونا عمران خان تون اوڑدہی مسنے، او اونا جان جوڑی نا بارواٹ پاننگ کیک، اونا جندانا ڈاکٹر دا ایوان نا اسہ شرفمند ءُ باسک اسے پارے کہ عمران خان نا خن نا ویل اس ئس ہرا کرار کرار آ داسہ سہی مسنے، اونا جان جوڑی ءِ ہچ ءُ خطرہ اس اف، بلڈ پریشر نا دارو او کنیک و دا وئی اتون اوار چلینگسا کاہک، او ہڑدے مسہ گھنٹہ ورزش کیک، ہڑدے گچین کنشست کنیک۔ اونا جان جوڑی آ سیاست کننگپ۔ او پارے کہ نن ہراتم زندان اٹ ئسن تو جناح ہسپتال اٹ کنا سرجری نا وخت آ اسہ سائیکاٹرسٹ اسے نا ڈیوٹی ءِ خلنگا کہ آپریشن نا وڈیو ءِ گدریفوئی ءِ کہ اونا آپریشن مسنے یا آخا۔ ننا ناجوڑی و مشکل آتے زیات تالان کننگاکہ۔ عمران خان ءِ کورٹ انا پرمان آ ہسپتال دننگانے، اونا رپورٹ آتے ہُننگ مریک۔ اونا جان جوڑی نا بارواٹ فکر مند مننگ نا ہچ ءُ ہیت اس اف۔ او پارے کہ سیاست اسہ مشکل ءُ کاریم اسے، داٹی آزمائشت آک ہم بریرہ۔ او پارے کہ میاں نواز شریف نا پلیٹ لیٹس نا کمتی آ ملنڈ کننگاکہ۔ اونا زوت آتے اٹ جنیوا ٹی اِرا سرجری مسنے، او است انا ناجوڑی و شوگر نا مریض ءِ، او آزمائشت آتیان گدرینگانے، اونا اُرائی کزیت کرے، اونا پلیٹ لیٹس آ دا ایوان اٹ ہیت کریرہ۔ عمران خان نا چندی ویڈیوتے داڑے نشان تننگ کینہ ہراٹی او اونا ناجوڑی آ ملنڈ کریکہ۔ او پارے کہ دا ملک و ایوان نا سالمیت ءِ ہروخت چیلنج اٹ تخنگ حب الوطنی اف، ننا کل سرکڑدہ غاک دزگیر ئسر و نن دا ایوان اٹ برسا کارروائی نا بشخ مسنہ، تینا بزنس ءِ سرتسنہ۔ نن وختس پاتون کہ ننا سرکڑدہ غاک بندی ءُ تو نن ایوان نا کارروائی ٹی بشخ ہلپنہ۔ دا نا بنداو آ سسٹم ءِ خطرہ ٹی تخنگپ۔ جوزہ غاک حق آٹو ولے داوڑ ویل آک ایسر مفسہ۔ دا ملک اٹ سیاسی آب وخت اس ہم بڑزکو متنے ہنداسوب آن زرس سگ انا حوصلہ ودی کننگے۔