قومی اسمبلی ،بانی پی ٹی آئی نا نن نیمہ غا ہسپتال آن دننگ آ اپوزیشن نا برانز

قومی اسمبلی نا دیوان اٹ بانی پی ٹی آئی عمران خان ءِ نن نا تہاری ٹی اسہ ہسپتال آن ایلو ہسپتال آ گدریفنگ نا باندات آ اپوزیشن بھاز برانز کرے، اپوزیشن راہشون محمود خان اچکزئی و بیرسٹر گوہر حکومت آن دا باندات آ پاش حوال خواہسر۔ اپوزیشن لیڈر محمود خان اچکزئی پارے کہ اسہ کنڈ آ مذاکرات و جوان سیاسی چاگڑد نا ہیت مریک تو ایلو کنڈ آ داوڑ انا گام گیج آتیان حالیت آتے خراب کننگ انگ ءِ۔ قومی اسمبلی ٹی تران کرسا اپوزیشن لیڈر محمود خان اچکزئی پارے کہ جوان ڈائیلاگ نا چاگڑد جوڑ مریک تو سما اف ہراکان بدخواہک نیام تمسا اودے خراب کیرہ۔ نن نا تہاری ٹی بانی پی ٹی آئی ءِ اسہ ہسپتال آن ایلو ہسپتال آ گدریفنگا، اسہ جوان ءُ چاگڑد اسے منٹ اس خراب کننگ خوارہ۔ او پارے کہ اونا ایڑھءِ ہسپتال نا اسہ پین کمرہ سے ٹی بند کننگا۔ پی ٹی آئی نا بندغ آتے ہم ہیت کننگ نا موکل تننگے۔ محمود اچکزئی پارے کہ ریاست الس آن جوڑ مریک، نن بیرہ دا پارینہ کہ اگہ کس اس ڈوہدار ہم ارے تو اونا حق ءِ کہ او تینا خاہوت تون اوڑدہی کے۔ دا وخت آ وزیر دفاع خواجہ آصف پارے کہ گوہر صاحب ءِ ہیت کننگ نا موکل تننگے، ہراڑان پد اسپیکر مائیک ءِ بیرسٹر گوہر ءِ تس۔ بیرسٹر گوہر ایوان اٹی تران کرسا پارے کہ حکومت امنا کے یا کپ ولے دنیا امنا کیک کہ بانی پی ٹی آئی مچ ملک انا پنی آ راہشون ءِ۔ دنیا دا ہم امنا کیک کہ گڑاس بندغ آتے اونا اسہ خننگ ہم سگنگ مفک۔ او پارے کہ جنوری ٹی اول حکومت نا کنڈ آن بیان تننگا کہ بانی پی ٹی آئی ءِ شفٹ کننگانے و اونا خن تا ویل اس ارے‘ نن دا باندات آ 25 وار ہائی کورٹ و 17 وار سپریم کورٹ آ ہنان، ولے کل عدالت آتیا ہننگ آن پد ہم ننے انصاف رسینگتو۔ بیرسٹر گوہر پارے کہ نن تینا بندغ آتے پاریسن کہ ہموڑے ہچ ءُ ویڈیو اس جوڑ کننگپ‘ تینا سپورٹر و ووٹر آتے ہم پارین کہ کس اس شفا انٹرنیشنل ہسپتال آ ہنپ۔ نن سپریم کورٹ نا پارت ءِ شرف ایتنہ و دا وڑ انا ہچ ءُ کاریم اس کپننگ نا پارین ہراڑان بانی پی ٹی آئی نا درمان معطل مرے۔