ایران تون ہچ ءُ مذاکرات اس مفننگ ءِ، دمدستی گمان تے ہم اف،امریکی صدر ڈونلڈ ٹرمپ

واشنگٹن، تہران، امریکی صدر ڈونلڈ ٹرمپ پارینے کہ امریکہ و ایران نا نیام اٹی نہ تو مذاکرات مننگ اٹی ءِ و نئے داسکان ہچ ءُ مذاکرات اس پک مسنے۔ تینا سوشل میڈیا پلیٹ فارم ‘ٹروتھ سوشل’ آ اسہ پوسٹ اسے ٹی صدر ٹرمپ نوشتہ کرے کہ ‘اسلامی جمہوریہ ایران تون نئے تو ہیت و گپ یا مذاکرات برجا ءِ و نئے اوفتا ہچ ءُ شیڈول اس پک ءِ۔ ٹرمپ مستی پارے کہ بحری ناکہ بندی پورو واکداری و بھرمی وڑ اٹ برجا ءِ وخت اس کہ آبنائے ہرمز ملوک ءِ و سمندر اٹی ساڑی کل بارودی سرنگ آتے اینک کننگانے یا اوفتے بھس کننگانے۔ داکان بیدس ٹرمپ تینا راجی رابطہ نا پلیٹ فارم ٹروتھ سوشل آ نیامی دے ٹِک نا اسہ نقشہ اس شیئر کرے ہراٹی آبنائے ہرمز ءِ امریکہ نا بشخ گونداسس۔ یات سلے کہ ایران جنگ انا بناغان پد امریکی صدر کیہی وار دا دعویٰ کرینے کہ آبنائے ہرمز امریکہ نا کنٹرول اٹی ءِ۔ ایلو کنڈآ ایرانی وزیر خارجہ عباس عراقچی پارینے کہ جنگ اٹی امریکہ نا اصل مسخت ایران ءِ سلہہ بٹنگ آ بیوس کننگ ئس ولے نن پیدوار کرینن کہ نن ہچ ءُ حالیت اسے ٹی سلہہ بٹپنہ۔ تینا اسہ بیان اسے ٹی او دعویٰ کرے کہ ‘امریکہ داسہ ننا شڑت آتا رِداٹ ننتون مذاکرات کن پوہاڑ کننگ اٹی ءِ۔ عباس عراقچی مستی پارے کہ امریکہ تون دستخط کروک آ مفاہمت نا یادداشت اٹی ’13 ٹک آک ننا حق اٹی و بیرہ اسہ ٹک اس اوفتا حق اٹی ءِ۔ عباس عراقچی پیدوار کرے کہ ‘نن جنگ ءِ ہم کٹان و نن سفارتی پڑ آ ہم سرسہبی دوئی کرین و نن دشمن ءِ تینا شڑت آتا مننگ آ بیوس کرینن’۔ ایران نا نائب وزیر خارجہ کانودی و جہانی باندات کاظم غریب آبادی امریکی صدر ڈونلڈ ٹرمپ نا کنڈ آن آبنائے ہرمز ءِ ‘پوسکن آ امریکی علاقہ’ گوندنگ آ سخت ردِ عمل ترسا پارینے کہ دا اہم آبی کسر نا بابت ٹرمپ نا ‘تغ تخنگ۔ زُوت چٹک۔ کاظم غریب آبادی تینا اسہ بیان اسے ٹی نوشتہ کرے، ‘زُوت آبنائے ہرمز نا بابت ٹرمپ نا تغ یا تو تینے آن تینٹ چٹک یا گڑا نن دا وہم اٹی اختہ بندغ نا تغ ءِ خراب کینہ۔